کوئٹہ،15 اپریل (اے پی پی): چیف سیکرٹری بلوچستان شکیل قادر خان نے مزید بارشوں سے قبل ہی متعلقہ محکموں کو اپنی تمام تر پیشگی تیاریاں مکمل کرنے کی ہدایت کی ہے۔
چیف سیکرٹری بلوچستان شکیل قادر خان کی زیر صدارت صوبے میں بارشوں سے متاثرہ علاقوں اور امدادی کارروائیوں کے حوالے سے اجلاس منعقد ہوا،اجلاس میں متوقع شدید بارشوں اور اس سے پیدا ہونے والی صورتحال اور امدادی اقدامات کے حوالے سے تبادلہ خیال کیا گیا۔
کمشنر کوئٹہ حمزہ شفقات نے اجلاس کو بریفنگ دیتے ہوئے کہا کہ مختلف اضلاع میں شدید بارشوں سے گھروں کو نقصان پہنچا ہے۔کوئٹہ میں 156 ملی میٹر بارش ریکارڈ ہوئی،چاغی میں 80، پشین 20، کوئٹہ 30 جبکہ ہرنائی، گوادر میں بھی گھروں کو نقصان پہنچا ہے۔ انہوں نے بتایا کہ بدھ سے شدید بارشوں کا ایک اور سپیل کا امکان ہے۔
اجلاس سے خطاب کرتے ہوئے چیف سیکرٹری بلوچستان شکیل قادر خان نے مزید بارشوں سے قبل ہی اپنی تمام تر پیشگی تیاریاں مکمل کرنے کی ہدایت کی اور کہا کہ تمام انتظامی افسران کسی بھی ہنگامی صورتحال سے بروقت نمٹنے اور لوگوں کو کسی بھی صورتحال میں محفوظ مقامات پر منتقل کرنے کے حوالے سے الرٹ رہیں۔انہوں نے کہا کہ انتظامیہ عوام کو قبل از وقت ریسکیو اور امدادی کارروائیوں کو منظم طریقے سے سر انجام دے، شدید بارشوں اور سیلابی ریلوں کی وجہ سے نالوں پر سے تجاوزات اور رکاوٹوں کے خاتمے کے لیے اقدامات اٹھائے جائیں۔
چیف سیکرٹری بلوچستان شکیل قادر خان نے کہا کہ سیلابی صورتحال میں ریلیف اور ریسکیو کے کام کو سرانجام دینے کے لیے تمام ضروری مشینریز کی موجودگی کو یقینی بنایا جائے۔انہوں نے کہا کہ ضلعی انتظامیہ شہروں سے بارش کی پانی کو جلد از جلد نکالنے کے لیے اقدامات کریں۔
