اسلام آباد،14 مئی(اے پی پی):وفاقی وزیر برائے منصوبہ بندی ترقی اور خصوصی اصلاحات احسن اقبال کی زیر صدارت وزیر اعظم پاکستان کی ہدایات پر تشکیل دی جانے والی کمیٹی پلاننگ کمیشن کے کردار اور اصلاحات کے حوالے سے اعلیٰ سطحی اجلاس منگل کومنعقد ہوا جس میں پاکستان میں پائیدار ترقی کے لیے ضروری اقتصادی اصلاحات اور صلاحیت سازی کے اہم پہلوؤں کاتفصیلی جائزہ لیا گیا۔
اجلاس میں وفاقی وزیربرائے بجلی و آبہ وسائل مصدق ملک، ایم این اے علی پرویز ملک ، سیکرٹری منصوبہ بندی ، سیکرٹری کیبنٹ اور وزارت منصوبہ بندی کے اعلیٰ حکام نے شرکت کی۔
اجلاس سے خطاب کرتے ہوئے وفاقی وزیر احسن اقبال کا کہنا تھا کہ وزارت منصوبہ بندی کے آپریشنل اور تکنیکی ڈیپارٹمنٹ اپنی بہترین کارکردگی دکھا رہے ہیں ، مگر اس کے باوجود ہمیں وزارت کے اندر تجربہ کار اور مختلف شعبوں میں مہارت رکھنے والے ماہرین پر مشتمل تھینک ٹینکس،بنیادی مقاصد کے حصول کے لیے ہنر مند اور پیشہ ورانہ امور پر مہارت رکھنے والے افسران اور ٹیکنو کریٹیس کی اشد ضرورت ہے۔ انہوں نے کہا کہ مارکیٹ سے پیشہ ورانہ مہارت اور تجربہ کے حامل افراد کو اٹھانے کے لیے ہمیں اپنے پے سکیلز پر نظر ثانی کرنی پڑے گی۔
وفاقی وزیر کا مزید کہنا تھا کہ 2013 سے 2018 کے دوران اسی وزارت اور منصوبہ بندی کمیشن نے اپنے سارے اہداف محدود وسائل ہونے کے باوجود انتہائی کامیابی سے حاصل کیے ۔ وژن 2025 بھی پلاننگ کمیشن ہی نے دیا۔ اس میں کوئی شک نہیں کہ وزارت منصوبہ بندی کا کردار قابل تعریف ہے ۔ ان کا کہنا تھا کہ اٹھارویں ترمیم کے بعد تمام صوبوں کو اختیارات تو منتقل کر دیئے گئے مگر بد قسمتی سے پی ایس ڈی پی فنانسنگ کے حوالے سے واضع پالیسی آج تک نہ دی جا سکی۔ پلاننگ کمیشن کا موجودہ سٹرکچر اٹھارویں ترمیم سے پہلے کا ہے۔ ہمیں موجودہ ڈھانچے کو ازسر نو جانچنے اور اس میں ضروری اصلاحات کرنےکی اشد ضرورت ہے ۔
