جدہ ،28مئی (اے پی پی):سعودی عرب میں پاکستان کے سفیر احمد فاروق نے اسلامی ترقیاتی بینک (آئی ایس ڈی بی) گروپ کے چیئرمین ڈاکٹر محمدالجاسر کو اسلامی ترقیاتی بینک کےہیڈ کوارٹر میں ہلالِ قائداعظم میڈل پیش کیا۔
تقریب میں سعودی عرب اور اسلامی تعاون تنظیم (او آئی سی ) میں پاکستان کے مشنز کے نمائندوں نے شرکت کی۔ ’’ہلالِ قائداعظم‘‘میڈل پاکستان کے اعلیٰ ترین سول ایوارڈز میں سے ایک ہے جو غیر ملکی شہریوں کو خصوصی میرٹ یا پاکستان کے لئے ان کی نمایاں خدمات پر دیا جاتا ہے۔ صدر پاکستان نے یہ تمغہ ڈاکٹر الجاسر کو ان کے اہم کردار اور پاکستان کے اقتصادی اور ترقیاتی ایجنڈے کی حمایت اور اہم عالمی فورمز پر تعاون میں آئی ایس ڈی بی گروپ کی قیادت کے لئے دیا تھا۔
