اسلام آباد 21 مئی (اے پی پی ):وفاقی وزیر قانون و انصاف اعظم نذیر تارڑ نے کہاہے کہ انسانی سمگلنگ کے روک تھام کے لیے اقدامات کیے جارہے ہیں ، غیر قانونی نقل مکانی ایک سنگین عالمی مسئلہ ہے شہریوں کو ایسا ماحول فراہم کرنا ہوگا کرے جہاں وہ اپنے ملک میں اپنا مستقبل دیکھ سکیں لیکن یہ ماحول تمام اسٹیک ہولڈرز کی مشترکہ کوششوں سے ہی پیدا کیا جا سکتا ہے۔
قومی کمیشن برائے انسانی حقوق ( این سی ایچ آر) کی جانب سے” پاکستان سے بے قاعدہ ہجرت “ پر رپورٹ کے اجراءکے موقع پر منعقدہ تقریب سے بطور مہمان خصوصی خطاب کرتے ہوئے وفاقی وزیر قانون و انصاف اعظم نذیر تارڑ نے کہاکہ بے قاعدہ ہجرت کے سنگین مسئلے کے حل سے قبل اس کا پس منظر دیکھنا ہوگا اور ان وجوہات کا احاطہ کرنا ہوگا جن کے باعث لوگ اپنے پیاروں کو چھوڑ کر کسی دوسری جگہ جانے پر مجبور ہوتے ہیں ۔ غیر قانونی نقل مکانی کے دوران متعدد تکلیف دہ مراحل سے گزرنا پڑتا ہے ،اس عمل کے دوران متعدد جان لیوا واقعات بھی رونما ہوتے دیکھے گئے ہیں ،ان حادثات سے بچ جانے والے انسانی سمگلرز کے ہتھے چڑھ جاتے ہیں۔
وفاقی وزیر قانون و انصاف اعظم نذیر تارڑ نے کہا ھے کہ اگر کوئی بھی فرد اپنی پیشہ وارانہ مہارت کے بل بوتے پر کسی بھی ملک جانا چاہے تو اسکے لیے آسانیاں فراہم کی جانی چاہیئں اور اس مقصد کے لیے قواعد و ضوابط میں نرمی ضروری ہے ۔ انہوں نے کہاکہ یہ رپورٹ انتہائی اہمیت کی حامل ہے اور این سی ایچ آر کی یہ رپورٹ کابینہ سمیت تمام متعلقہ فورمز میں پیش کی جائے گی ۔
