سرگودھا، 17 مئی (اے پی پی): ڈپٹی کمشنر کیپٹن ریٹائرڈ اورنگزیب حیدر خان نےانسداد ڈینگی سرگرمیوں کا جائزہ لیتے ہوئے افسران کو مزید توجہ دینے کی ہدایت کرتے ہوئے کہا کہ انسداد ڈینگی مہم کی کامیابی کیلئے محنت، لگن اور جذبے سے کام کیا جائے۔ مچھر کی افزائش نسل کی روک تھام انتہائی ضروری ہے۔ وہ جمعہ کے روز اپنے دفتر کے کانفرنس روم میں ضلعی رابطہ کمیٹی برائے انسداد ڈینگی کے اجلاس سے خطاب کررہے تھے۔
ڈپٹی کمشنر نے کہا کہ انسداد ڈینگی ٹیمیں تمام ہاٹ سپاٹس کی باقاعدگی سے چیکنگ کریں، انسداد ڈینگی ٹیمیں جوہڑوں، تالابوں، زیر تعمیر عمارتوں، سروس اسٹیشنز، ٹائر شاپس، کاٹھ کباڑ شاپس، ہوٹلز اور دیگر عوامی مقامات پر کڑی نظر رکھیں، جہاں کہیں مچھر کے لاروے کا شبہ ہو تو فوری ٹیسٹ کیلئے لیبارٹری بھجوایا جائے۔ انہوں نے مزید کہا کہ سرکاری عمارتوں اور دفاتر کی چھتوں کو بھی چیک کیا جائے اور وہاں پر کسی قسم کا پانی وغیرہ کھڑا نہیں ہونا چاہیے۔ عوام الناس میں اس ضمن میں شعور اجاگر کرنے کے لیے سمینارز سمیت دیگر آگاہی پروگرام منعقد کراوائے جائیں ۔ انہوں نے انسداد ڈینگی ٹیموں کی وقتا فوقتاً ٹریننگ کروانے کی بھی ضرورت پر زور دیا ۔ ڈپٹی کمشنر نے شہریوں سے اپیل کی ہے کہ انسداد ڈینگی ٹیموں سے تعاون کریں اور اس سے بچاؤ کیلئے حکومتی ہدایات پر عملدرآمد یقینی بنائیں ۔ اجلاس میں سی او ہیلتھ ڈاکٹر اسد اسلم سمیت تمام متعلقہ محکموں کے سربراہان موجود تھے۔
