کوئٹہ، 23 مئی (اے پی پی): وزیر اعلیٰ بلوچستان میر سرفراز بگٹی نے کہا کہ بلوچستان کا ہر شہری امن کا خواہاں ہے، بلوچستان کے مسئلے کو سمجھنے کے لئے تاریخ سے واقفیت ضروری ہے لوگوں کو حقائق بتانے کی ضرورت ہے۔
ان خیالات کا اظہار 13ویں نیشنل ورکشاپ بلوچستان کے شرکاء سے خطاب کرتے ہوئے کہی۔وزیر اعلیٰ بلوچستان میر سرفراز بگٹی نے کہا کہ آئندہ دو سالوں میں 30 ہزار جوانوں کو ہنر مند بناکر بیرون ملک روزگار کے مواقع فراہم کریں گے۔انہوں نے کہا کہ انسرجنسی کی وجہ پسماندگی نہیں ذاتی مفادات ہیں۔انہوں نے کہا کہ صحت اور تعلیم کے شعبوں میں اصلاحات لانے کی کوشش کررہے ہیں 70 سالہ بگڑے نظام کو چند مہینوں میں درست کرنا ممکن نہیں ہے۔
وزیراعلی نے کہا کہ آئندہ دو سالوں میں 30 ہزار جوانوں کو ہنر مند بناکر بیرون ملک روزگار کے مواقع فراہم کریں گے جبکہ گریجویٹ بزنس پلان لائیں گے، بلا سود قرضہ دیں گے، بلوچستان میں بینظیر بھٹو اسکالرشپ پروگرام شروع کیا گیا ہے جس میں بنیادی سطح سے اعلی سطح تک تعلیمی اسکالرشپ دیں گے، سائنسز میں پی ایچ ڈی کرنے والے بلوچستان کے ہر طالب علموں کو اسکالرشپ دیں گے جبکہ دنیا بھر کی 200 اعلیٰ ترین جامعات میں تعلیم کے لئے مکمل اسکالر شپ دیں گے۔
