اسلام آباد،03 مئی (اے پی پی): ترجمان مذہبی امور کی جانب سے حج 2024 کیلئے فلائٹ آپریشن کی تفصیلات جاری کر دی گئیں ہیں ۔
حج 2024 کیلئے فلائٹ آپریشن 9 مئی تا 9 جون جاری رہے گا، پہلے 15 روز تمام پروازیں براہ راست مدینہ منورہ ایئرپورٹ اتریں گی جبکہ 24 مئی تا 9 جون بیشتر پروازیں جدہ ایئرپورٹ پر اتریں گی۔
فلائٹ آپریشن کے پہلے روز 11 پروازوں کے ذریعے 2160 عازمین سعودی عرب روانہ ہوں گے،اسلام آباد سے 3 پروازوں کے ذریعے 680، کراچی سے 02 پروازوں کے ذریعے 330 جبکہ لاہور سے 03 پروازوں کے ذریعے 670 مسافر حج کے لیے روانہ ہوں گے۔
ملتان سے دو پروازوں کے ذریعے 329 عازم کرام سفر حج کا آغاز کریں گے جبکہ سیالکوٹ سے ایک پرواز کے ذریعے 151 عازمینِ کرام مدینہ منورہ پہنچیں گے۔کوئٹہ سے پہلی حج پرواز 11 مئی جبکہ سکھر سے پہلی حج پرواز 27 مئی کو روانہ ہو گی۔
259 حج پروازوں کے ذریعے 68 ہزار سے زائد سرکاری عازمینِ حج سعودی عرب پہنچیں گے۔
حج فلائٹ آپریشن 9 جون کو اختتام پذیر ہو گا اور 20 جون کو پہلی پرواز حجاجِ کرام کو لے کر وطن واپس پہنچے گی۔
