سکھر،24مئی(اے پی پی):سکھر آئی بی اے یونیورسٹی میں ہائر ایجوکیشن کمیشن (ایچ ای سی) کی تعاون سے جامعات کے معیار کو یقینی بنانے کے لیے تین روزہ ورکشاپ کا انعقاد کیا گیا،ورکشاپ کا مقصد پاکستان میں اعلیٰ تعلیمی اداروں میں معیار کو یقینی بنانے کے حوالے سے کوششوں کا جائزہ لینا اور ضابطوں کا تعین کرنا تھا، ورکشاپ کا محور پاکستان میں اعلیٰ تعلیم کے معیار کے اصولوں پر پیش رفت کا جائزہ، مشاورت، اور گائیڈ لائنز فار کوالٹی ایشورنس ان ہائر ایجوکیشن(پی ایس جی – 2023) تھا۔ورکشاپ میں سندھ اور پنجاب کی 30 یونیورسٹیوں کے کوالٹی اینہانسمنٹ سیلز کے ڈائریکٹرز کو اکٹھا کیا۔
اختتامی تقریب میں مہمان خصوصی چیئرمین ضلع کونسل سید کمیل حیدر شاہ نے سکھر آئی بی اے یونیورسٹی اور ایچ ای سی کی اعلیٰ تعلیمی معیار کو فروغ دینے کی کوششوں کو سراہا،اس موقع پہ وائس چانسلر پروفیسر ڈاکٹر آصف احمد شیخ نے کہا کہ سکھر آئی بی اے یونیورسٹی اور ایچ ای سی کے درمیان باہمی تعاون پر مبنی ورکشاپ جامعات میں معیار کو بہتر بنانے کی جانب ایک اہم قدم ہے۔
ڈاکٹر سعید ابڑو نے سکھر آئی بی اے یونیورسٹی کی جانب سے حاضرین کو خوش آمدید کہا، جب کہ ناصر شاہ نے تعلیمی معیار کو برقرار رکھنے اور بلند کرنے میں پی ایس جی – 2023 کی اہمیت اور مقاصد پہ روشنی ڈالی،انہوں نے اس بات پر زور دیا کہ کوالٹی اشورینس فریم ورک تعلیمی معیار کو برقرار رکھنے اور بلند کرنے میں اپنا کردار ادا کرتے ہیں اور قومی اور بین الاقوامی سطح پر جامعات کی ساکھ اور مسلسل بہتری اور احتساب کا کلچر فروغ پا رہا ہے۔
