اسلام آباد،17 مئی(اے پی پی):وزیردفاع خواجہ محمدآصف نے کہاہے کہ سیکورٹی خدشات کے تناظرمیں قومی اسمبلی کی عمارت اور لابیوں میں حفاظتی اقدامات کویقینی بناناضروری ہے۔
جمعہ کوقومی اسمبلی کے اجلاس میں وزیردفاع نے کہاکہ بلڈنگ میں داخلہ کے مقام پر سینکڑوں لوگ موجود ہوتے ہیں جن کااتہ پتہ نہیں ہوتا کہ انہیں کون لایا ہے، بلکہ باہربھی لوگ موجود ہوتے ہیں۔اس سے سیکورٹی کاخدشہ ہے۔انہوں نے کہاکہ ان کے پاس معلومات ہیں کہ کسی بھی وقت کوئی ناخوشگوار واقعہ ہوسکتاہے، داسومیں جوواقعہ ہوا ہے وہ گاڑی دس دن پاکستان میں رہی، یہاں کوئی چیکنگ نہیں ہے اورکوئی بھی مشکوک شخص داخل ہوسکتاہے۔میری درخواست ہے کہ سیکورٹی خدشات کے تناظرمیں احتیاطی اقدامات کویقینی بنایا جائے۔ انہوں نے کہاکہ گیلری میں بیٹھے ہوئے لوگ نعرے لگاتے ہیں جس سے ایوان کاتقدس مجروح ہورہاہے ۔یہ سلسلہ ختم ہونا چاہئیے۔ہمیں ایوان کی عزت کو برقراررکھنا چاہئیے۔ اتنا رش ہوتا ہے کہ ہم گاڑیوں میں نہیں بیٹھ سکتے ۔
