لاہور، 29 مئی، (اے پی پی): گورنر پنجاب سردار سلیم حیدر خان سے پیپلزپارٹی سرگودھا، پیپلز سٹوڈنٹس فیڈریشن پنجاب اور پیپلز پارٹی مینارٹی ونگ کے وفود نے گورنر ہاوس لاہور میں ملاقات کی۔
جنرل سیکرٹری پاکستان پیپلز پارٹی وسطی پنجاب حسن مرتضٰی اور انفارمیشن سیکرٹری شہزاد سعید چیمہ بھی اس موقع پر موجود تھے ۔ سرگودھا سے تسنیم قریشی، پی ایس ایف کے صدر موسیٰ کھوکھر اور پیپلزپارٹی مینارٹی ونگ سے عمران اٹھوال اور ایڈون سہوترا نے اپنے اپنے وفود کی سربراہی کی۔
گورنر پنحاب نے پارٹی وفود کو گورنر ہاوس میں خوش آمدید کرتے ہوئے کہا کہ صرف پیپلز پارٹی نہیں پورے پنجاب کا گورنر ہوں۔ گورنر ہاوس کے دروازے کارکنوں اور عوام کے لیے کھلے ہیں۔
گورنر پنجاب نے کہا کہ پیپلز پارٹی اپنے کارکنوں کو عزت و احترام دیتی ہے۔ پنجاب کی بہتری کے لیے آئینی کردار ادا کروں گا۔ سردار سلیم حیدر نے کہا کہ آپس کے اختلافات بھلا کر ملک کی ترقی اور استحکام کے لیے دن رات کام کرنا ہے۔ گورنر پنجاب نے وفد کو مسائل حل کرنے کی یقین دہانی بھی کرائی۔
