لاہور، 18 مئی (اے پی پی ):وفاقی وزیرداخلہ محسن نقوی نے نادرا سنٹر شملہ پہاڑی کا اچانک دورہ کیا، وفاقی وزیرنے مختلف کاونٹرز پر جاکر شہریوں سے ملاقات کی اور مسائل پوچھے۔
نادرا سنٹر میں رش کم تھا، شہریوں کی باری بھی جلد آ رہی تھی ۔وفاقی وزیرداخلہ محسن نقوی نے نادرا سنٹر شملہ پہاڑی کے شفٹ انچارج اور عملے کو شاباش دی۔وزیرداخلہ نے سنٹر میں موجود شہریوں سے شناختی کارڈز اور دیگر دستاویزات کے عمل کے بارے پوچھا، وزیرداخلہ محسن نقوی نے شہریوں سے استفسار کیا کہ اب انتظار زیادہ تو نہیں کرنا پڑتا۔ شہریوں نے سسٹم کی بہتری پر اطمینان کا اظہار کیا اور کہا کہ باری جلد آرہی ہے، انتظار نہیں کرنا پڑ رہا۔
وفاقی وزیرداخلہ محسن نقوی نے رات کی شفٹ میں رش پر بہتر طریقے سے قابو پانے کا حکم دیا۔انہوں نے کہا کہ نادرا سنٹر شملہ پہاڑی کا پہلے بھی دورہ کر چکا ہوں ، پہلے صورتحال خراب تھی، آج اس سنٹر آکر خوشی ہوئی ہے ۔انہوں نے کہا کہ شہریوں کے نادرا سنٹر میں فوری کام ہو رہا ہے جو خوش آئند ہے۔ شہریوں کے لئے مزید آسانیاں پیدا کرنے کے لیے اقدامات جاری رکھیں گے۔
