اسلام آباد،23 مئی (اے پی پی): حج کے مقدس فریضے کی ادائیگی کے لیے پاکستانی عازمین کی سعودی عرب آمد کا سلسلہ جاری ہے اور اب تک 126 حج پروازوں کے ذریعے 31 ہزار 57 سرکاری عازمینِ حج سعودی عرب پہنچ گئے ہیں جبکہ آج 12 پروازوں کے ذریعے مزید 24 سو 50 عازمینِ حج مدینہ منورہ پہنچیں گے۔
ترجمان وزارت مذہبی امور کے مطابق پرائیویٹ حج سکیم کے 2 ہزار سے زائد عازمین کرام بھی سعودی عرب پہنچ گئے ہیں۔اب تک 16 ہزار 5 سو عازمینِ کرام کی سعودی حکام کے خصوصی تعاون سے ریاض الجنہ کی زیارت مکمل ہو گئی جبکہ 12 ہزار 435 عازمینِ کرام زیارتِ مدینہ منورہ مکمل کر کے عمرہ کی ادائیگی کیلئے مکہ پہنچ گئے ہیں۔
ترجمان کے مطابق پاکستان سے جدہ کیلئے براہ راست حج پروازوں کا آغاز 24 مئی سے ہو گا۔
عازمینِ حج کی طبی سہولیات کیلئے 156 جبکہ آمدو رفت، رہائش و خوراک کے انتظامات کیلئے 336 افراد پر مشتمل معاونین مصروف عمل ہیں جبکہ مکرمہ کے مین کنٹرول آفس میں پاک حج موبائل ایپ کے ذریعے عازمینِ حج کی رہنمائی اور معاونت کا سلسلہ بھی جاری ہے ۔
