ملتان،21 مئی (اے پی پی ): ضلعی انتظامیہ کے زیر اہتمام 3 روزہ خصوصی پولیو مہم کا آغاز 3 جون سے ہو گا،محکمہ صحت کی جانب سے 10 لاکھ سے زائد بچوں کو گھر گھر پولیو قطرے پلانے کا ہدف مقرر کیا گیا ہے۔
ڈپٹی کمشنر کیپٹن ریٹائرڈ رضوان قدیر کی صدارت میں محکمہ صحت کا پولیو انتظامات بارے اجلاس منعقد ہوا۔ڈپٹی کمشنر نے کہا کہ پولیو مہم کیلئے موبائل ٹیمیں تشکیل دے کر عوامی مقامات پر کیمپ لگائے جائیں گے۔انہوں نے کہا کہ وطن عزیز سے پولیو کا مکمل خاتمہ حکومت کی ترجیحات میں شامل ہے ۔ انہوں نے کہا کہ پولیو مہم میں تعاون نہ کرنے والے والدین کے خلاف سخت ایکشن لیا جائے گا۔
ڈپٹی کمشنر نے کہا کہ لیڈی ہیلتھ ورکرز، محکمہ صحت ویکسی نیٹرز کی خصوصی تربیت بھی کرائی گئی ہے۔انہوں نے کہا کہ ہر ہسپتال، ڈسپینسری، بس سٹینڈ ، ویگن اسٹینڈ اور ریلوے اسٹیشن پر پولیو کی ٹیمیں موجود رہیں گی ۔انہوں نے مزید کہا کہ شہری ذمہ داری کا احساس کرتے ہوئے اپنے بچوں کو پولیو کے قطرے پلائیں ۔
اجلاس میں اسسٹنٹ کمشنر سٹی سیمل مشتاق ،اسسٹنٹ کمشنر صدر عامر افتخار اور سی ای او ہیلتھ ڈاکٹر فیصل قیصرانی بھی موجود تھے۔
