ملتان۔ 17 مئی ) اے پی پی):قرعہ اندازی کی تقریب محکمہ زرعی انجینئرنگ کے زیر اہتمام کاٹن ریسرچ انسٹیٹیوٹ میں منعقدہ کی گئی۔ تقریب کے مہمان خصو صی ممبر صوبائی اسمبلی پنجاب محمد سلمان نعیم تھے 110 سپر سیڈر اور 28 رائس سٹرا شیڈر کیلئے قرعہ اندازی کی گئی۔
تقریب سے خطاب کرتے ہوئے رکن صوبائی اسمبلی محمد سلمان نعیم نے کہا کہ حکومت پنجاب کی طرف سے زرعی مشینری پر 60 فیصد سبسڈی فراہم کی جارہی ہے ، حکومت ٹرانسفارمنگ پنجاب ایگریکلچر پلان کے تحت سموگ پر قابو پانے کے لئے بھرپور کاوشیں کر رہی ہے ۔ سموگ کنٹرول پروگرام کے تحت پنجاب بھر میں 5 ارب روپے کی لاگت سے 5 ہزار سپر سیڈر اور 2 ہزار رائس سٹرا شریڈر کی فراہمی کی جارہی ہے۔
ایم پی اے نے کہا وزیراعلیٰ پنجاب مریم نواز شریف کاشتکاروں کی فلاح و بہبود کے لئے بھرپور اقدامات کر رہی ہیں ، حکومت پنجاب کی طرف سے کاشتکاروں کو کسان کارڈ کے ذریعے اربوں روپے کی سبسڈی دی جائےگی ، ہماری زراعت بہت جلد ترقی یافتہ ممالک کے برابر ہو گی ۔
انہوں نے کہاکہ اب ہم زراعت میں جدت کی طرف قدم بڑھا رہے ہیں سلمان نعیم نے کہا سپر سیڈر اور رائس سٹراشریڈر کی مدد سے مونجی / دھان کی فصل کی باقیات کو تلف کیا جائے گا ، ماحولیاتی آلودگی کے خاتمے میں مدد ملے گی ، ہم اپنی آنے والی نسلوں کو صاف ستھرا، پاکیزہ اور خوبصورت ماحول فراہم کر سکیں گے ۔
سلمان نعیم نے کہا کہ جدید مشینری کی فراہمی سے ریسرچ انسٹیٹیوٹز اور کاشتکاروں کے درمیان فاصلہ کم ہو گا ایڈیشنل ڈائریکٹر جنرل زرعی انجینئرنگ افضل طاہر نے کہا اب دھان کی باقیات کی جلانے کی ضرورت نہیں پڑے گی ، جدید مشینری کی مدد سے آسانی سے دھان کی باقیات کو تلف اور ساتھ ہی گندم کی کاشت بھی کی جاسکے گی۔
انہوں نے کہا کہ سپر سیڈر پر حکومت پنجاب کی طرف سے فی کس 8 لاکھ 10 ہزار روپے سبسڈی دی جائے گی، رائس سٹرا شیڈر پر حکومت پنجاب کی طرف سے 3 لاکھ 30 ہزار روپے سبسڈی دی جارہی ہے۔
اس موقع پر ایم پی اے نازک کریم لانگ کے نمائندے رانا احسن رسول ، ڈائریکٹر زراعت ملتان ڈویژن شہزاد صابر اور کاشتکاروں کی کثیر تعداد موجود تھی۔
