اسلام آباد،20 مئی(اے پی پی): محکمہ موسمیات نے ملک بھر میں 21 سے 27 مئی کے دوران معمول سے زیادہ درجہ حرارت بڑھنے کا امکان ظاہر کیا ہے اور اس دوران شہریوں کو احتیاطی تدابیر اختیار کرنے کی تلقین کی ہے۔
محکمہ موسمیات کے مطابق سندھ اور پنجاب میں 21 سے 23 مئی کے دوران دن کا درجہ حرارت معمول سے 04 سے 06 ڈگری سینٹی گریڈزیادہ اور 23 سے 27 مئی کے دوران 06 سے 08 ڈگری سینٹی گریڈزیادہ رہنے کا امکان ہے۔
اسلام آباد، خیبرپختونخوا، کشمیر، گلگت بلتستان اور بلوچستان میں 21 سے 27 مئی کے دوران دن کا درجہ حرارت معمول سے 04 سے 06 ڈگری سینٹی گریڈ زیادہ رہنے کا امکان ہے۔
پیر کے روز ملک کےبیشترعلاقوں میں موسم گرم اور خشک جبکہ وسطی اورجنوبی علاقوں میں شدید گرم رہنے کے علاوہ بعد از دوپہر جھکڑ /گرد آلود ہوائیں چلنے کا امکان ہے۔ تاہم شام/رات میں بالائی خیبر پختونخوا ، گلگت بلتستان اور کشمیر میں مطلع جزوی ابر آلود رہنے کے علاوہ تیز ہوائیں /جھکڑ چلنے اور گرج چمک کے ساتھ چند مقامات پر ہلکی بارش ہو سکتی ہے۔
گزشتہ چوبیس گھنٹوں کے دوران ملک کے بیشتر علاقوں میں موسم گرم اورخشک جبکہ جنوبی/وسطی علاقوں میں شدید گرم رہا۔ جبکہ بالائی خيبر پختونخوا ، جیوانی، قلات، گلگت بلتستان اور نور پور تھل میں چند مقامات پر گرج چمک کے ساتھ بارش ہوئی۔
سب سے زیادہ بارش دیر(بالائی) میں 11، مالم جبہ 09،کالام 04، بلوچستان میں جیوانی،قلات 05، گلگت بلتستان میں بگروٹ 04، گلگت 03، بونجی،ہنزہ 02 جبکہ پنجاب میں نور پور تھل میں01 ملی میٹر ریکارڈ ہوئی۔
گزشتہ روز ریکارڈ کیے گئے زیادہ سے زیادہ درجہ حرارت کے مطابق جیکب آباد میں 47، موہنجوداڑو، دادو، لاڑکانہ، اور نواب شاہ میں 46ڈگری سینٹی ریکارڈ کیا گیا۔
