اسلام آباد،21 مئی(اے پی پی): محکمہ موسمیات نے ملک بھر میں 22 سے 27 مئی کے دوران معمول سے زیادہ درجہ حرارت بڑھنے کا امکان ظاہر کیا ہے اور اس دوران شہریوں کو احتیاطی تدابیر اختیار کرنے کی تلقین کی ہے۔
محکمہ موسمیات کے مطابق سندھ اور پنجاب میں 22 سے 24 مئی کے دوران دن کا درجہ حرارت معمول سے 04 سے 06 ڈگری سینٹی گریڈزیادہ اور 24 سے 27 مئی کے دوران 06 سے 08 ڈگری سینٹی گریڈزیادہ رہنے کا امکان ہے۔
اسلام آباد، خیبرپختونخوا، کشمیر، گلگت بلتستان اور بلوچستان میں 22 سے 27 مئی کے دوران دن کا درجہ حرارت معمول سے 04 سے 06 ڈگری سینٹی گریڈ زیادہ رہنے کا امکان ہے۔
منگل کے روز ملک کےبیشتر علاقوں میں موسم گرم اور خشک جبکہ وسطی اورجنوبی علاقوں میں شدید گرم رہے گا۔
گزشتہ 24 گھنٹوں کے دوران بالائی خیبر پختونخوا ، کشمیراور گلگت بلتستان میں چند مقامات پر گرج چمک کے ساتھ بارش ہوئی۔سب سے زیادہ بارش پارااچنار اور گڑہی دوپٹہ کشمیر میں08،بنوں 05، کالام 03، مالم جبہ 02 جبکہ بگروٹ میں 01ملی میٹر ریکارڈ ہوئی۔
گزشتہ روزریکارڈ کیے گئے زیادہ سے زیادہ درجہ حرارت کے مطابق سبی میں 48،بہاولنگر، بھکر، کوٹ ادو، موہنجو داڑو، شہید بینظیر آباد، جیکب آباد 47،سکرنڈ، بہاولپور،ڈیرہ غازی خان، جھنگ، خانیوال اور لاڑکانہ میں 46ڈگری سینٹی ریکارڈ کیا گیا۔
