اسلام آباد،22 مئی(اے پی پی): محکمہ موسمیات نے ملک بھر میں 22 سے 27 مئی کے دوران معمول سے زیادہ درجہ حرارت بڑھنے کا امکان ظاہر کیا ہے اور اس دوران شہریوں کو احتیاطی تدابیر اختیار کرنے کی تلقین کی گئی ہے۔
محکمہ موسمیات کے مطابق سندھ اور پنجاب میں 22 مئی کے دوران دن کا درجہ حرارت معمول سے 04 سے 06 ڈگری سینٹی گریڈزیادہ جبکہ 23 سے 27 مئی کے دوران 06 سے 08 ڈگری سینٹی گریڈزیادہ رہنے کا امکان ہے۔ اسلام آباد، خیبرپختونخوا، کشمیر، گلگت بلتستان اور بلوچستان میں 22 سے 27 مئی کے دوران دن کا درجہ حرارت معمول سے 04 سے 06 ڈگری سینٹی گریڈ زیادہ رہے گا۔
گزشتہ 24 گھنٹوں کے دوران بھی ملک کے بیشتر میدانی علاقے شدید گرمی کی لپیٹ میں رہے۔
گزشتہ روز ریکارڈ کیے گئے زیادہ سے زیادہ درجہ حرارت کے مطابق موہنجو داڑو انچاس(49)، سبی، جیکب آباد اڑتالیس (48)، لاڑکانہ، کوٹ ادو، خیرپور، دادو سینتالیس (47)، تربت، روہڑی، رحیم یار خان، نور پور تھل، اوکاڑہ، شہید بینظیر آباد، لسبیلہ، قصور اور بھکر میں چھیالیس(46)ڈگری سینٹی ریکارڈ کیا گیا۔
