لاہور17مئی (اے پی پی): وزیراعلیٰ پنجاب مریم نوازشریف کی زیر صدارت ایلیٹ پولیس فورس ہیڈ کوارٹر کمیٹی روم میں اجلاس منعقد ہوا جس میں صوبہ بھر میں امن وامان سے متعلق امور کا جائزہ لیا گیا۔
آئی جی پنجاب نے امن وامان کی صورتحال کے بارے میں تفصیلی بریفنگ دی.پولیس، پراسیکیوشن ڈیجیٹل مانیٹرنگ میں بہتری کے لئے اقدامات پر پیش رفت کا بھی جائزہ لیا گیا۔
اجلاس میں ریپ کی سزا دس سے پندرہ سال تک بڑھانے کی تجویز کا جائزہ لیا گیا۔گینگ ریپ ، بچوں سے زیادتی اور گھریلو ملازمین پر تشدد کے واقعات کے سدباب کے لئے موثر اقدامات کا فیصلہ بھی کیا گیا۔
وزیراعلیٰ پنجاب نے پولیس کو کوراڈ کاپٹر ڈرون اور دیگر جدید ترین ٹیکنالوجی سے لیس کرنے فنڈز کے اجرا کے لئے اصولی منظوری دی۔بریفنگ میں بتایا گیا کہ پولیس کےلئے سائبر کرائم انوسٹی گیشن ٹریننگ مکمل کرلی گئی ہے۔ پولیس افسروں اور اہلکاروں کو جدید ٹیکنالوجی پر دسترس کے لئے ٹرینینگ جاری ہے۔
وزیر اعلیٰ پنجاب نے کہا کہ پولیس کو پورے وسائل مہیا کریں گے،کرائم کو ہر صورت میں ختم کرنا ہے۔سینیٹر پرویز رشید، سینئر صوبائی وزیر مریم اورنگزیب، وزیر اطلاعات عظمیٰ زاہد بخاری،ایم پی اے ثانیہ عاشق، چیف سیکرٹری، ہوم سیکرٹری، آئی جی،ایڈیشنل آئی جی اور دیگر حکام نے اجلاس میں شرکت کی۔
