لاہور، 14مئی ( اے پی پی ) وزیراعلی پنجاب مریم نوازشریف اور قائد مسلم لیگ ن محمد نواز شریف میو ہسپتال چلڈرن ایمرجنسی بلاک پہنچ گئے ۔وزیراعلی مریم نوازشریف اور قائد محمد نواز شریف نے چائلڈ ایمرجنسی کے مختلف شعبوں کا معائنہ کیا ۔وزیراعلی مریم نوازشریف اور قائد ن لیگ محمد نواز شریف نے ٹرائیج ایریا میں مریض بچوں کے والدین سے بات چیت کی-سٹیپ ڈاؤن ایریا، نرسنگ روم،نیو نیٹل بلاک فارمیسی کا بھی معائنہ کیا۔
وزیراعلی مریم نوازشریف اور قائد محمد نواز شریف کو چائلڈ لائف فاونڈیشن کے زیر اہتمام ایمرجنسی بلاک کے بارے میں بریفنگ دی گئی-چائلڈ لائف فاؤنڈیشن کی ایڈمنسٹریٹر بشری عباس نے مریض کے داخلے،تشخیص اور علاج کے طریقہ کار سے آگاہ کیا ۔وزیراعلی مریم نوازشریف اور قائد مسلم لیگ ن محمد نواز شریف نے والدین سے بات چیت،تجاویز سنیں ۔
وزیراعلی مریم نوازشریف نے میو ایمرجنسی وارڈ کے وزٹ کے فورا بعد میٹنگ طلب کر لی جس میں پنجاب کے ہسپتالوں میں او پی ڈی رات دس بجے تک کرنے کی تجویز کا جائزہ لیا گیا۔اجلاس میں ہسپتالوں میں کتے کے کاٹے کی ویکسین کی دستیابی یقینی بنانے کی ہدایت کی گئی ۔
چائلڈ لائف فاؤنڈیشن کے سی ای او احسن ربانی نے اجلاس کے شرکاء کو بریفنگ دی اور بتایا کہ پنجاب کے کسی بچے کو کوالٹی ایمرجنسی سے 30 منٹ سے زیادہ دور نہیں ہونا چاہیے۔ہر چائلڈ ایمرجنسی میں تیز ترین آٹو میشن سسٹم سے مریض بچے کی جان بچائی جاسکتی ہے۔ پنجاب بھر میں 153 ہسپتالوں کی ایمرجنسی وارڈ میں ٹیلی میڈیسن پروگرام فنکشنل ہوچکا ہے۔
اجلاس سے خطاب کرتے ہوئے وزیر اعلیٰ پنجاب مریم نواز نے کہا کہ سرکاری دفاتر اور ہسپتالوں میں ورک ایتھکس کو بہتر بنانے کی اشد ضرورت ہے،سپتالوں خاص طور پر ایمرجنسی میں مانیٹرنگ کی ضرورت ہے۔سابق دور حکومت میں ہیلتھ سیکٹر کی تباہی میں کسر نہیں چھوڑی گئی-انہوں نے کہا کہ ماضی میں صنعتیں سرکاری تحویل میں نہ لی جاتیں تو آج ہر شعبے میں انڈیا سے آگے ہوتے-قائد مسلم لیگ ن محمد نوازشریف نے کہا کہ بہترین علاج ہر غریب آدمی کا حق ہے۔
سینئر صوبائی وزیر مریم اورنگزیب، سینیٹر پرویز رشید، وزیراطلاعات عظمی زاہد بخاری، صوبائی وزرا صحت خواجہ عمران نذیر، خواجہ سلمان رفیق، ایم این اے بلال اظہر کیانی، ڈاکٹر اظہر کیانی،ڈاکٹر عدنان خان، ڈاکٹر محمود ایاز اور دیگر بھی موجود تھے۔
