اسلام آباد، 17 مئی (اے پی پی): وزیرِ اعظم محمد شہباز شریف سے مشروبات بنانے والی بین الاقوامی کمپنیوں کے وفد نے اسلام آباد میں ملاقات کی۔
وفد کے ارکان نے وزیرِ اعظم کی قیادت میں حکومت کی کاروبار دوست پالیسیوں پر انہیں خراجِ تحسین پیش کیا۔وفد نے آگاہ کیا کہ بین الاقوامی مشروبات بنانے والی کمپنیوں کے پاکستان میں 25 کے قریب کارخانے ہیں جن میں 1 لاکھ 30 ہزار لوگوں کو براہ راست روزگار فراہم کیا جاتا ہے۔وفد نے وزیرِ اعظم کو کمپنیوں کی جانب سے ملک میں ری سائیکلنگ کے سب سے بڑے نظام کے حوالے سے آگاہ کرنے کے ساتھ ساتھ بتایا کہ یہ کمپنیاں ملکی خزانے کو ٹیکس کی مد میں ہر سال خطیر حصہ ادا کرتی ہیں۔
اس موقع پر وزیرِ اعظم نے کہا کہ بیرونی سرمایہ کاروں اور کاروباری برادری کو ملک میں روزگار کی فراہمی، ملکی برآمدات میں اضافے اور معاشی ترقی میں اپنا بھرپور کردار ادا کرنے کیلئے حکومت ہر قسم کی معاونت فراہم کر رہی ہے۔ خوش آئند امر ہے کہ حکومت کی کاروبار دوست پالیسیوں کے مثبت نتائج آنا شروع ہو گئے ہیں۔ بین الاقوامی کمپنیاں کارپوریٹ سوشل ریسپانسبیلیٹی (سی ایس آر) کے تحت سرگرمیوں سے اپنا مثبت کردار ادا کریں۔
وزیرِ اعظم نے متعقلہ حکام کو بین الاقوامی کمپنیوں کی تجاویز پر مشاورت کے بعد ان کے مسائل کا حل جلد پیش کرنے کی ہدایت کی۔
اجلاس میں کوکاکولا پاکستان و افغانستان کے نائب صدر وولکان اونگُچ، محمد کھوسہ سی ای او پیپسی کو پاکستان و افغانستان کی قیادت میں وفد نے شرکت کی۔ وفاقی وزراء جام کمال خان، رانا تنویر حسین، عبدالعلیم خان اور متعلقہ اعلیٰ حکام بھی اجلاس میں شریک تھے۔
