اسلام آباد، 29 مئی (اے پی پی): وزیرِ اعظم محمد شہباز شریف سے بدھ مت کے رہنماؤں کے ایک وفد نے بدھ کو یہاں ملاقات کی۔ یہ وفد وزارت خارجہ کے زیر اہتمام ایک سمپوزیم اور “گندھارا سے دنیا تک” کے عنوان سے ایک نمائش میں شرکت کے لیے پاکستان کے دورے پر ہے۔
وزیراعظم نے وفد کا خیر مقدم کرتے ہوئے سمپوزیم میں ان کی شرکت پر اظہار تشکر کیا، جو”ویساک ڈے” کے سلسلے میں منعقد کیا جا رہا ہے جو مہاتما بدھ کی پیدائش، روشن خیالی اور انتقال کی یاد میں منایا جاتا ہے۔وفد میں سری لنکا کے وزیر برائے بدھاساسنا، مذہبی اورثقافتی امور، ودورا وکرمانائیکا ، ویتنام سے تھیچ ڈک ٹوان ، تھائی لینڈ سے انیل ساکیا اور نیپال سے ڈاکٹر کیشبمن شاکیا شامل تھے۔ وزیراعظم نے کہا کہ پاکستان کو اپنے بدھ مت کے قدیم ورثے پر فخر ہے، جو دو ہزار سال قبل گندھارا آرٹ اور ثقافت کی شکل میں شمال مغربی پاکستان میں پروان چڑھا۔ انہوں نے بین المذاہب ہم آہنگی اور افہام و تفہیم کے فروغ کے لیے بدھ مت کے علما اور راہبوں کی گراں قدر خدمات کا بھی اعتراف کرتے ہوئے کہا کہ حکومت بین المذاہب ہم آہنگی کو کلیدی اہمیت دیتی ہے۔
بدھ رہنمائوں نے تمام مذاہب کے لیے شمولیت و احترام کی ثقافت اور بدھ مت کے ورثے کے مقامات اور ثقافتی اشیاء کے تحفظ اور فروغ کے لیے پاکستان کی کوششوں کی تعریف کی، اسکے علاوہ پاکستان میں بدھ مت کے ورثے کے تحفظ اور فروغ کے لیے پاکستان کے ساتھ تعاون کی خواہش کا بھی اظہار کیا۔
ملاقات کے دوران وزیراعظم اور وفد نے بین المذاہب مکالمے اور تعاون کو مضبوط بنانے کے طریقوں کے ساتھ ساتھ پاکستان اور بدھ اکثریتی ممالک کے درمیان ثقافتی اور علمی تبادلوں کے مواقع پر تبادلہ خیال کیا۔
ملاقات میں باہمی افہام و تفہیم اور تعاون کی راہیں تلاش کرنے اور مزید ہم آہنگی اور عالمی امن کے لیے مل کر کام کرنے کے عزم کا اعادہ اور بات چیت اور تعاون کے لیے ایک مشترکہ فورم کے قیام کے امکان پر خاص طور پر تبادلہ خیال کیا گیا۔
ملاقات میں وزیر مذہبی امور چوہدری سالک حسین، وزیر اطلاعات و نشریات و ثقافتی ورثہ عطاء اللہ تارڑ اور معاون خصوصی سید طارق فاطمی نے بھی شرکت کی۔
