اسلام آباد،10(اے پی پی): وفاقی وزیر اطلاعات عطاءاللہ تارڑ سے پاکستان کے دورہ پر آئے بنگلہ دیشی صحافیوں کے وفد نے جمعے کے روز ملاقات کی، جس میں آزادی اظہار رائے، حکومت کے معاشی اقدامات سمیت مختلف اہم امور پر تبادلہ خیال ہوا۔
وزیر اطلاعات نے بتایا کہ وزیراعظم شہباز شریف کی زیر قیادت حکومت کی پوری توجہ معاشی استحکام پر مرکوز ہے اور موجودہ حکومت کے اقتدار میں آنے کے بعد معاشی اشاریئے مثبت ہو رہے ہیں، عالمی جریدے بھی پاکستانی معیشت میں بہتری کی پیشنگوئی کر رہے ہیں۔
وفاقی وزیر نے وفد کو معیشت کے فروغ،روزگار کے بھر پور مواقع کی فراہمی،ٹیکس اصلاحات اور انفراسٹرکچر کے منصوبوں میں سرمایہ کاری کے حوالے سے لیے گئے حکومتی اقدامات سے بھی آگاہ کیا۔
عطا تارڑ نے کہا کہ حکومت پاکستان آزادی صحافت اور آزادی اظہار رائے کی اہمیت کو تسلیم کرتی ہے،صحافیوں کے حقوق کے تحفظ کے لئے پرعزم ہیں اور سوشل میڈیا کے غلط استعمال اور جعلی خبروں کے پھیلاﺅ کے لئے عالمی سطح پر اقدامات کی ضرورت ہے۔
بنگلہ دیشی صحافیوں کا شکریہ ادا کرتے ہوئے وزیر اطلاعات نے کہا کہ ہم آپ کے مشکور ہیں کہ پاکستان دورے پر آئے اور حکومت کے معاشی اقدامات کے بارے میں جاننے میں دلچسپی لی۔
بنگلہ دیشی صحافیوں کے وفد نے پاکستان میں میزبانی اور تعاون کی فراہمی پر حکومت پاکستان، وزارت اطلاعات اور صحافتی اداروں کا شکریہ ادا کیا اور بتایا کہ پاکستان کا دورہ کر کے بہت اچھا لگا، اس طرح کے دوروں سے دونوں ممالک کے درمیان تعلقات اور عوامی سطح پر روابط کو فروغ حاصل ہوگا۔
بنگلہ دیشی صحافیوں کے وفد میں اقتدار احمد، مکرم حسین، ریاض احمد، شیخ ساجد، محمد عبدالودود، جبون احمد سارکار، قمر الزمان اور معین الحق شامل تھے۔
اس موقع پر ایگزیکٹو ڈائریکٹر جنرل ایکسٹرنل پبلسٹی ونگ عنبرین جان اور وزارت اطلاعات کے دیگر اعلیٰ افسران بھی موجود تھے۔
