لاہور، 22 مئی (اے پی پی):وزیر تعلیم پنجاب رانا سکندر حیات نے لندن میں جاری ایجوکیشن ورلڈ فورم کی تعلیمی کانفرنس میں شرکت کی۔رانا سکندر حیات ایجوکیشن ورلڈ فورم میں پاکستان کے صوبہ پنجاب کی نمائندگی کر رہے ہیں۔ وزیر تعلیم نے فورم کو موجودہ حکومت کے تعلیم کے حوالے سے اقدامات بارے آگاہ کیا۔ رانا سکندر حیات نے ایجوکیشن ورلڈ فورم کو مسلم لیگ ن کے تعلیمی ویژن اور ممکنہ اصلاحات سے بھی آگاہ کیا۔ انہوں نے کہا کہ لندن میں جاری ایجوکیشن ورلڈ فورم میں پنجاب کی نمائندگی قابل فخر ہے۔ وزیر تعلیم پنجاب نے کہا کہ دنیا بھر سے آئے ماہرین تعلیم کا باہم استفادہ ایک منفرد سرگرمی ہے۔ مختلف ممالک کے وزرائے تعلیم کا اجتماع ایک دوسرے کے تجربات سے استفادہ کا باعث بنے گا۔ ورلڈ ایجوکیشن کانفرنس مشترکہ تعلیمی چیلنجز سے نمٹنے اور سماجی شراکت داری میں معاون ثابت ہوگی۔ وزیر تعلیم نے کہا کہ کمیونٹی نیٹ ورک اور تعلیمی استفادہ کے ضمن میں ورلڈ ایجوکیشن کانفرنس اہمیت کی حامل ہے۔تعلیمی کانفرنس میں 130 ممالک کے وزرائے تعلیم و سیکرٹری تعلیم شریک ہیں۔ ایجوکیشن ورلڈ فورم میں پنجاب کے سیکرٹری ایجوکیشن ڈاکٹر احتشام نے بھی شرکت کی۔
