اسلام آباد، مئی 29 (اے پی پی): وفاقی وزیر برائے مذہبی امور اور بین المذاہب ہم آہنگی چودھری سالک حسین سے قازقستان کے سفیر یرژان کِسٹافن نے ملاقات کی جس میں باہمی دلچسپی کے امور اور دوطرفہ تعلقات کے حوالے سے تفصیلی بات چیت کی گئی۔
ملاقات کے دوران دو طرفہ تعلقات کی مزید فروغ دینے پر اتفاق کیا گیا اس موقع پر بات کرتے ہوئے وفاقی وزیر برائے مذہبی امور کا کہنا تھا کہ پاکستان طلبہ کا ڈیٹا قازقستان کے ساتھ شیئر کرے گا تاکہ تشدد کا کوئی واقعہ نہ ہو اس کے علاوہ دونوں ممالک کےمتعلقہ حکام کو سکیورٹی ڈائیلاگ کا اہتمام کرنا چاہیے ۔
چودھری سالک حسین نے کہا کہ قازقستان کی ائیرلائن پاکستان کے ساتھ رابطے کا ذریعہ بن سکتی ہے، ہم ائیر لائن بزنس کو مزید وسعت دے سکتے ہیں۔
سفیر قازقستان یرژان کِسٹافن نے کہا کہ اسلامو فوبیا سے نمٹنا مسلم ممالک کی ترجیحات میں سے ایک ہے، پاکستان اور قازقستان کے درمیان مذہبی مکالمہ پر بات چیت انتہائی ضروری ہے۔
انہوں نے بتایا کہ ہم آئندہ ماہ مذہبی کانفرنس منعقد کرانے کی تیاری کر رہے ہیں امید کرتے ہیں پاکستان کی کانفرنس میں شرکت سے مذہبی مکالمہ کو تقویت ملے گی : سفیر قازقستان یرژان کِسٹافن کا کہنا تھا کہ ہم قازقستان میں پاکستانی طلبہ کو دوستانہ ماحول فراہم کرنا چاہتے ہیں، ہمیں ایک فریم ورک بنا نے کی ضرورت ہے تاکہ نوجوان آبادی پر توجہ مرکوز کر سکیں ۔دونوں رہنماؤ ں نے ملاقات کو انتہائی خوشگوار قرار دیا۔
