اسلام آباد،23 مئی (اے پی پی): وفاقی وزیر برائے بین الصوبائی رابطہ رانا ثناءاللہ نے وزارت بین الصوبائی رابطہ کا با قاعدہ چارج سنبھال لیا۔ وفاقی سیکرٹری ندیم ارشاد کیانی اور وزارت کے دیگر اعلی حکام نے وفاقی وزیر کا استقبال کیا اور وزارت کے امور پر تفصیلی بریفنگ دی۔
بریفننگ میں وفاقی وزیر رانا ثناءاللہ کو ملک میں ساؤتھ ایشین گیمز کے انتظامات اور تیاری کے بارے آگاہ کیا گیا جس پر وفاقی وزیر نے اظہار اطمینان کیا۔ رانا ثناء اللہ کا کہنا تھا کہ ساؤتھ ایشین گیمز میں بین الاقوامی معیار کو ملحوظ خاطر رکھتے ہوئے مطلوبہ اہداف کو حاصل کیا جائے۔ بزنس کمیونٹی کے تعاون اور سپانسر شپ کے ذریعے،ساؤتھ ایشین گیمز کا انعقاد جدید ماڈل پر کریں گے۔ اُنہوں نے کہا کہ وزیر اعظم کے وژن کے مطابق ملک میں کھیلوں کی ترقی اور فروغ کے لئےہر ممکن اقدامات کریں گے۔ساؤتھ ایشین گیمز اور دیگر انٹرنیشنل ایونٹس سے دنیا میں پاکستان کا امیج بہتر ہو گا۔
رانا ثناءاللہ نے پاکستان سپورٹس بورڈ کو نوجوان نسل کو کھیل کے میدان میں لانے کے لئے ایک جامع پروگرام پیش کرنے کی ہدایت دی۔
