مدینہ منورہ 17 مئی (اے پی پی): وفاقی وزیر مذہبی امور چوہدری سالک حسین نے مدینہ منورہ میں عازمین حج کی رہائش گاہوں کا اچانک دورہ کیا، اس دوران انہوں نے پاکستانی عازمین کرام سے ملاقاتیں اور حج انتظامات بارے آراء بھی حاصل کیں۔
عازمین کرام نے وفاقی وزیر مذہبی امور کو اپنے درمیان پا کر خوشگوار حیرت کا اظہار کیا اور کہا کہ موجودہ حکومت کی جانب سے پاکستان اور سعودی عرب میں انتظامات پہلے سے بہت اچھے ہیں جبکہ رہائش گاہوں، خوراک، سفری سہولیات اور عملہ کی خدمات مثالی ہیں۔
اس موقع پر بات کرتے ہوئے وفاقی وزیر برائے مذہبی امور کا کہنا تھا کہ حج انتظامات ہر سال بہتری کی طرف گامزن ہیں، پاکستان حج مشن کی انتھک محنت کی بدولت سرکاری سکیم کے اخراجات خطہ میں سب سے کم ہیں۔ انہوں نے پاکستان حج مشن کے پڑوسی ممالک سے حج اخراجات کا تقابل عوام کے سامنے رکھا۔
وفاقی وزیر نے ہدایت دی کہ بزرگ اور نیم خواندہ عازمین حج کو موبائل ایپ اور سم کے استعمال میں معاونت فراہم کی جائے۔
وزیر مذہبی امور آج کیٹرنگ کمپنیوں اور سعودی ادارے “ادلہ مدینہ” کا دورہ کریں گے۔
