مکہ مکرمہ ، 20 مئی (اے پی پی):وفاقی وزیر برائے مذہبی امور چوہدری سالک حسین نے پیر کویہاں پاکستان حج میڈیکل مشن کے تحت قائم مرکزی ہسپتال کا دورہ کیا اور ڈی جی حج عبدالوہاب سومرو، ڈائریکٹر مکہ فہیم آفریدی کے ہمراہ عازمین حج سے تاثرات بھی لیے۔
اس موقع پر سربراہ حج میڈیکل مشن بریگیڈیئر جمیل لاکھیر نے ہسپتال کے شعبہ جات کا دورہ کروایا اور بریفنگ دی جس کے بعد وفاقی وزیر چوہدری سالک حسین نے پاکستانی عازمین حج کیلئے دستیاب طبی سہولیات کے معیار پر اطمینان کا اظہار کیا ۔
اس موقع پر وفاقی وزیر کا کہنا تھا کہ وطن سے دور ہم زبان معالج کی دستیابی کسی نعمت سے کم نہیں اس لیے رواں سال ٹیسٹنگ سروس کے ذریعے حج میڈیکل مشن میں بہترین ڈاکٹرز اور پیرامیڈیکل سٹاف کا انتخاب کیا ہے۔انہوں نے کہا کہ ہسپتالوں میں جدید ترین ایمبولینس سروس، لیبارٹری، ایکسرے، فارمیسی، زنانہ و مردانہ وارڈ، شعبہ دندان موجود ہیں۔
انہوں نے عازمین حج کو ہدایت دی کہ عازمین حج متوازن غذا کا استعمال کریں اور ایام حج کیلئے جسمانی طور پر تیار رہیں، حج سخت گرمی کے موسم میں آ رہا ہے، عازمین کرام مشروبات اور چھتری کا استعمال لازمی کریں۔
