سرگودھا، 10 مئی(اے پی پی): کمشنر سرگودھا ڈویژن محمد اجمل بھٹی نے چاروں ڈپٹی کمشنروں کو پرائس مجسٹریٹس کے فوری اجلاس طلب کرکے ناقص کارکردگی کے حامل پرائس کنٹرول مجسٹریٹس کو فوری تبدیل کرنے کی ہدایت کی ہے۔ انہوں نے کہا کہ پرائس کنٹرول کے حوالے سے اسسٹنٹ کمشنروں کا بھی فعال کردار نظر آنا چاہیے ۔ شہری کے ساتھ دیہی علاقوں میں بھی پرائس کنٹرول پر خاص توجہ دی جائے تاکہ عوام کو احساس ہو کہ ریاست ان کے حقوق کے لیے مصروف عمل ہے۔
ان خیالات کا اظہار انہوں نے جمعرات کو اعلیٰ سطحی اجلاس سے خطاب کرتے ہوئے کیا۔ اجلاس میں ڈپٹی کمشنر سرگودھا کیپٹن ریٹائرڈ اورنگزیب حیدر خان کے علاؤہ خوشاب ، میانوالی اور بھکر کے ڈپٹی کمشنروں نے ویڈیو لنک کے ذریعے شرکت کی۔
کمشنر نے کہا ڈپٹی کمشنرز انفورسمنٹ ڈیٹا کی اونر شپ لیں۔ تجاوزات کے خلاف آپریشن کو شہری مخصوص بازاروں کا علاقوں تک محدود کرنے کی بجائے قصبوں اور دیہاتوں میں بھی تمام پختہ و عارضی تجاوزات کو بھی فوری ختم کروایا جائے۔ انہوں نے دیہاتوں میں ویلج بورڈ بنا کر تحصیلداروں اور پٹواریوں کو روزانہ کی بنیاد پر اپنے اپنے علاقوں کا دورہ کرکے ویلج بورڈ کی نگرانی میں تجاوزات ختم کروانے کی بھی ہدایت کی۔
انہوں نے سمگل شدہ تیل کے خلاف کریک ڈاؤن تیز کرنے اور نقل و حمل پر نظر رکھنے کےلئے بھکر اور میانوالی کے بین الصوبائی باڈرز پر کسٹم ، رینجر اور پولیس کے ساتھ دیگر قانون نافذ کرنے والے اداروں کی نمائندگی یقینی بنانے کی ضرورت پر بھی زور دیا۔ کمشنر نے غیر رجسٹرڈ فنی تعلیمی اداروں کی جانب سے کوالٹی ایجوکیشن فراہم نہ کرنے کا بھی نوٹس لیتے ہوئے ڈپٹی کمشنروں کو ایسے غیر رجسٹرڈ فنی تعلیمی اداروں کے خلاف فوری کارروائی کرنے اور ان کی ٹیوٹا کے پاس رجسٹریشن کروانے تک بند کروانے کے احکامات بھی جاری کیے۔
انہوں نے بھکر، میانوالی اور سرگودھا کے نئے تعینات ہوئے والے ڈپٹی کمشنرز کا خیر مقدم کرتے ہوئے کہا کہ ایک ٹیم کی صورت میں کام کرکے حکومت کے انڈیکٹر کو احسن انداز میں حل کیا جا سکتا ہے۔
اجلاس میں چاروں ڈپٹی کمشنروں نے پرائس کنٹرول ، تجاوزات آپریشن، ستھرا پنجاب ، سمگل شدہ آئل کے خلاف کریک ڈاؤن اور گندم، چینی اور کھاد کے ذخیرہ اندوزوں کے خلاف اب تک کی کارروائی بارے بریفنگ بھی دی۔
