لاہور؛ 21 مئی ( اے پی پی ) وزیر بلدیات پنجاب ذیشان رفیق کی زیرصدارت سول سیکرٹریٹ میں اجلاس ہوا۔چیف سیکرٹری زاہد اختر زمان، سیکرٹری ہائوسنگ اسداللہ، سیکرٹری لوکل گورنمنٹ شکیل احمد نے اجلاس میں شرکت کی۔کمشنر زید بن مقصود، ڈپٹی کمشنر رافعہ حیدر نے لاہور ری ویمپنگ پلان کی ہوم ورکنگ پر بریفنگ دی ۔
وزیر بلدیات پنجاب ذیشان رفیق نے اس موقع پر گفتگو کرتے ہوئے کہا کہ گزشتہ برسوں میں لاہور کے نظرانداز شدہ علاقوں کی بحالی کا جامع پروگرام بنایا جا رہا ہے، پلان کے تحت صوبائی دارالحکومت کے گلی محلوں کے مسائل کو مرحلہ وار حل کیا جائے گا، ٹوٹی گلیوں اور سیوریج کی تعمیر و مرمت کا کام پہلے کیا جائے گا، وزیر بلدیات پنجاب نے کہا کہ وزیراعلیٰ مریم نواز نے منتخب نمائندوں کی تجاویز کو مدنظر رکھنے کی ہدایت کی ہے،پنجاب بھر کی شہری اور دیہی آبادی کو یکساں میونسپل خدمات کی فراہمی پر کام ہو رہا ہے، ماسٹر پلان کی تیاری میں سکیموں کی ڈپلی کیشن سے گریز کیا جائے۔
چیف سیکرٹری پنجاب نے اس موقع پر کہا کہ لاہور ری ویمپنگ پلان کو آگے بڑھانے کیلئے متعلقہ محکمے مربوط کام کریں، پلان کے تمام تکنیکی پہلوئوں کو مدنظر رکھا جائے۔
