لاہور،31 مئی ( اے پی پی ) :گورنر پنجاب سردار سلیم حیدر خان سے پیپلزپارٹی لاہور کے وفد نے ملاقات کی۔وفد میں پاکستان پیپلزپارٹی لاہور کے چاروں ضلعی صدور اور پارٹی کارکنان شامل تھے۔ وفد میں پیپلزپارٹی کے سینئر رہنما شاہدہ جبین، الطاف قریشی ،عارف خان، حافظ غلام محی الدین اور حاجی عزیز الرحمن چن شامل تھے۔ نظامت کے فرائض احسن رضوی نے سر انجام دیے۔وفد نے سردار سلیم حیدر خان کو گورنر پنجاب بننے پر مبارکباد پیش کی ۔
گورنر پنجاب سردار سلیم حیدر خان نے اس موقع پر گفتگو کرتے ہوئے کہا کہ گورنر ہاؤس لاہور کے دروازے پوری پنجاب کی عوام کے لیے کھلے ہیں۔ملک میں ترقی اور استحکام کے لیے اتحادی حکومت کو مضبوط بنانا ہے۔
انہوں نے کہا کہ صدر پاکستان آصف علی زرداری کی فہم و فراست اور چیئرمین بلاول بھٹو زرداری کی انتھک محنت نے پیپلزپارٹی کو پنجاب میں مضبوط کیا۔تمام سیاسی جماعتوں کو اتحاد اور اتفاق سے پاکستان کو آگے لے کر بڑھنا ہے۔
تقریب سے لاہور کے چاروں ضلعی صدور زاہد ذوالفقار ، آصف ناگرہ، عاطف چوہدری اور امجد جٹ نے بھی خطاب کیا۔
