اسلام آباد، 5 جون (اے پی پی): اسپیکر قومی اسمبلی سردار ایاز صادق نےایرانی سفارت خانے کا دورہ کیا اور ایرانی سفیر سے مرحوم صدر ابراہیم رئیسی اور ہیلی کاپٹر حادثے کے دیگر شہداء کے لئے اظہار تعزیت اور فاتحہ خوانی کی۔سپیکر نے کہا کہ مرحوم صدر ابراہیم رئیسی بہت بڑے اسکالر اور سیاسی رہنما تھے اور صدر رئیسی کی شہادت نہ صرف ایران بلکہ مسلم امہ کے لیے بہت بڑا صدمہ ہے۔انہوں نے کہا کہ صدر رئیسی سے ان کے حالیہ دورہ پاکستان میں انتہائی مفید ملاقات ہوئی تھی اورصدر رئیسی اور وزیر خارجہ کو پاک ایران دوستی اور خطے میں مشترکہ ترقی اور خوشحالی کا بھرپور داعی پایا۔مشکل اور امتحان کی اس گھڑی میں پاکستان کی پارلیمان اور عوام اپنے ایرانی بھائیوں اور بہنوں کے شانہ بشانہ کھڑے ہیں۔۔ ایران کے سفیر کا ایرانی سفارتخانے آمد پر اسپیکر قومی اسمبلی کا شکریہ ادا کیا اور کہا کہ مرحوم صدر ابراہیم رئیسی اور دیگر شہداء کے لئے اظہار تعزیت کے پیغام اور سفارت خانے تشریف آوری پر آپکا ممنون ہوں۔ایرانی سفیر نے کہا کہ مرحوم صدر رئیسی کے مشن کو جاری رکھتے ہوئے ایران پاکستان تعلقات کو مزید مستحکم بنانے کے لیے کوششیں جاری رکھیں گے۔
