اٹک۔ 13 جون (اے پی پی):ڈپٹی کمشنر اٹک راؤ عاطف رضا نے کہا ہے کہ عید الاضحیٰ کے موقع پرمذہبی اجتماعات کوبھر پور سیکورٹی اور میونسپل سروسزفراہم کی جائیں گی۔ان خیالات کا اظہار ڈپٹی کمشنر اٹک راؤ عاطف رضا نے ڈی سی آفس اٹک میں ضلعی امن کمیٹی و بین المذاہب ہم آہنگی کمیٹی کے اجلاس کی صدارت کر تے ہوئے کیا۔
اجلاس میں ڈی پی او اٹک ڈاکٹر غیاث گل خان، ایڈیشنل ڈپٹی کمشنر جنرل انیل سعید، ضلعی افسران، ممبران ضلعی امن و بین المذاہب ہم آہنگی کمیٹی نے شر کت کی۔
اجلاس سے خطاب کر تے ہوئے ڈی سی اٹک نے کہا کہ ہمیں چاہیے کہ عید الاضحیٰ اور محرم الحرام میں بھر پور اتحاد و ایثار کا مظاہرہ کر یں جس کی تعلیما ت ہمار ے رسول حضرت محمد ﷺ نے امت مسلمہ کو دیں۔ انہوں نے کہا کہ ضرورت اس ا مر کی ہے کہ تمام مکاتب فکر کے افراد ایک جگہ اکٹھے ہوں جس کا درس ہمارے دین نے دیا ہے۔
ڈی سی اٹک نے کہا کہ ضلعی انتظامیہ نے اس سال عید الاضحیٰ اورمحرم الحرام کی تیاریاں مکمل کر لی ہیں۔عوام سے اپیل ہے کہ عید قربان کے موقع پر صفائی کا خاص خیال رکھیں۔ انتظامیہ کی طرف سے جاری ہو نے والے ضابطہء اخلا ق اورکانگو ایس او پیز پر بھر پور عمل درآمد کر یں۔
ڈی پی او اٹک ڈاکٹر غیاث گل خا ن نے اجلا س کے شر کاء سے خطاب کر تے ہوئے کہا کہ ضلع پولیس اٹک کی جانب سے عیدالاضحیٰ اور محرم الحرام میں تمام مذہبی سر گر میوں کو فول پر وف سیکورٹی فراہم کی جائے گی۔اس ضمن ضلعی انتظامیہ کے ساتھ مل کر خصوصی پلان تیار کر لیا گیا ہے اور اس پلان کے مطابق بھر پور عمل کیا جائے گا۔اس کے علاوہ ضلعی اور تحصیل سطع پر کنٹرول رومز بھی قائم کیے جائیں گے جہاں سے لمحہ بہ لمحہ تمام صورتحال کی سخت نگرانی کی جائے گی۔
اجلا س میں ممبران ضلعی امن اور بین المذاہب ہم آہنگی کمیٹی نے اپنے سفار شات اور تجاویز پیش کیں،جن پر قانون کے مطابق عمل در آمد کی یقین دہانی کروائی گئی۔ممبران نے اس عزم کا اظہار کیا کہ تمام مسالک، ضلعی انتظامیہ اور پولیس کے ساتھ بھر پور تعاون کا مظاہرہ کر یں گے۔
