اسلام آباد: 27 جون (اے پی پی): وزیراعظم محمد شہباز شریف سے ینگ پارلیمنٹیرینز کے وفد نے جمعرات کے روز پارلیمنٹ ہاؤس میں ملاقات کی جس میں متعلقہ حلقوں کے امور اور ملک کی مجموعی و سیاسی صورت حال اور حالیہ بجٹ سے متعلق بات چیت کی گئی۔
وزیراعظم نے وفد سے گفتگو میں کہا کہ ہم نے نئے مالی سال کے بجٹ میں عام آدمی کو ریلیف دینے کے لئے بھر پور اقدامات اٹھائے ہیں اور اللہ تعالیٰ نے آپ کو عوام کی خدمت کا موقع فراہم کیا ہے ؛ امید ہے آپ ملک کی ترقی و خوشحالی اور عوامی فلاح و بہبود کے لئے دن رات کام کریں گے۔
بجٹ میں کیئے گئے حکومتی اقدامات سے متعلق شہباز شریف نے وفد کو بتایا کہ قابل طلبہ کو حکومت کی طرف سے لیپ ٹاپس فراہم کئے جائیں گے، بجٹ میں آئی ٹی کے شعبے کے فروغ کے لئے تقریباً 100 ارب کے فنڈز رکھے گئے، اسکے علاوہ اسکلز ڈیویلپمنٹ اور کھیلوں کے شعبے کے لئے بھی تاریخی فنڈز مختص کئے گئے ہیں جبکہ حکومت نوجوانوں کو روزگار کے بھرپور مواقع فراہم کرنے اور ان کی اسکلز ڈویلپمنٹ کے لئے بہت سے منصوبوں پر بھی کام کر رہی ہے۔
وزیر اعظم نے کہا کہ حکومتی اداروں میں اصلاحات اور ریاستی ملکیتی اداروں کی نجکاری حکومت کی ترجیحات ہیں جن سے ملکی خزانے پر بوجھ کم کیا جا سکے گے اور پاکستان فلسطین کے مظلوم مسلمانوں کی اخلاقی اور سفارتی حمایت جاری رکھے ہوئے ہے۔
وفد میں اراکین قومی اسمبلی راجہ اسامہ سرور، بیرسٹر عقیل ملک، بیرسٹر دانیال چوہدری ، احمد عتیق انور، نوشین افتخار، رانا ارادت شریف خان، محمد عثمان اویسی ،عمار احمد خان لغاری ، ڈاکٹر شائستہ خان، زینب بلوچ ، سعد وسیم ،شاہد عثمان شامل تھے۔
