اسلام آباد۔7جون (اے پی پی): دفتر خارجہ کی ترجمان ممتاز زہرہ بلوچ نے کہا ہے کہ وزیراعظم شہباز شریف کے چین کے جاری پانچ روزہ دورے کے دوران وزیراعظم لی کیانگ کے ساتھ وفود کی سطح پر مذاکرات کے بعد دونوں فریقین نے ٹرانسپورٹ انفراسٹرکچر، صنعت، توانائی، زراعت، میڈیا، صحت، پانی، سماجی و اقتصادی ترقی اور باہمی دلچسپی کے دیگر شعبوں سمیت متعدد شعبوں میں دوطرفہ تعاون بڑھانے کے لئے 23 مفاہمت کی یادداشتوں پر دستخط کئے ہیں۔
آج دفتر خارجہ میں منعقد ہونے والی اپنی ہفتہ وار پریس بریفنگ کے دوران زہرہ بلوچ نے کہا کہ مذاکرات کے دوران فریقین نے ایک دوسرے کے بنیادی مسائل کے لیے غیر متزلزل حمایت کا اظہار کیا اور پاک چین اقتصادی راہداری(سی پیک) کی اعلیٰ معیار کی ترقی اور جاری منصوبوں کی بروقت تکمیل کے عزم کا اعادہ کیا۔
انہوں نے کہا کہ دونوں فریقین نے سی پیک کو نقصان پہنچانے والے عناصراور دشمنوں سے بچانے کے عزم کا اعادہ کیا اور وزیراعظم شہباز شریف نے پاکستان میں چینی اہلکاروں اور منصوبوں کی حفاظت کے لئے ہر ممکن اقدامات کی یقین دہانی کرائی۔
زہرہ بلوچ کا کہنا تھا کہ پاکستان نے مقبوضہ جموں و کشمیر میں انسانی حقوق کی خلاف ورزیوں پر بھارت کا احتساب کرنے کے مطالبے کا اعادہ کرتے ہوئے کہا ہے کہ گزشتہ تین دہائیوں کے دوران بھارتی فورسز کی حراست میں اب تک 7 ہزار سے زائد کشمیری شہید ہوچکے ہیں۔
انہوں نے اقوام متحدہ کی سلامتی کونسل کی قراردادوں کے مطابق تنازعہ جموں و کشمیر کے منصفانہ اور پرامن حل کے لئے کشمیری عوام کی مسلسل سیاسی، سفارتی اور اخلاقی حمایت کا اعادہ کرتے ہوئے اقوام متحدہ کی جنرل اسمبلی کے 182 ارکان کی بھاری حمایت کے ساتھ 26۔2025 کی مدت کے لئے اقوام متحدہ کی سلامتی کونسل کے غیر مستقل رکن کی حیثیت سے پاکستان کے انتخاب کو اجاگر کیا۔ انہوں نے اراکین بالخصوص ایشیا پیسفک گروپ کے اعتماد پر ان کا شکریہ ادا کیا۔
انہوں نے میڈیا کو بتایا کہ پاکستان سلامتی کونسل میں تنازعات کے پرامن حل، یکطرفہ طاقت کے استعمال کی مخالفت، ہر قسم کی دہشت گردی کا مقابلہ، اقوام متحدہ کی امن کوششوں کی حمایت، علاقائی اور بین الاقوامی بحرانوں کے حل اور جمہوریت، شفافیت اور احتساب کو فروغ دینے میں اپنا کردار ادا کرے گا۔
انہوں نے میڈیا کو بتایا کہ نائب وزیراعظم اور وزیر خارجہ محمد اسحاق ڈار غزہ کی صورتحال پر وزرائے خارجہ کی ڈی ایٹ کونسل کے غیر معمولی اجلاس میں شرکت کے لئے استنبول کا ایک روزہ دورہ کریں گے۔ ڈی ایٹ کے وزرائے خارجہ فوری اور غیر مشروط جنگ بندی اور غزہ کے عوام پر غیر انسانی اور بلاجواز جنگ کے خاتمے کے لئے بین الاقوامی برادری کی مشترکہ ذمہ داری پر تبادلہ خیال کریں گے۔ نائب وزیراعظم غزہ میں جاری نسل کشی اور غیر مشروط جنگ بندی، محاصرہ ختم کرنے اور فلسطینی عوام کے لیے انسانی امداد کی فوری ضرورت پر پاکستان کا موقف پیش کریں گے۔ ترجمان نے اسلام آباد میں تیونس کے سفیر بورہین الکامل کے طویل علالت کے باعث انتقال کے بارے میں میڈیا کو آگاہ کیا اور سوگوار خاندان کے ساتھ تیونس کی حکومت سے تعزیت اور ہمدردی کا اظہار کیا۔
