اسلام آباد۔15جون (اے پی پی):وزیراعظم محمد شہباز شریف نے کہاہے کہ حکومت کے اصلاحاتی ایجنڈے کا محور گورننس میں بہتری اور عوام کو بہترین سروسز کی فراہمی ہے،اصلاحاتی ایجنڈا کے حوالے سے کوئی کوتاہی برداشت نہیں کی جائے گی۔ان خیالات کا اظہار وزیراعظم محمد شہباز شریف نے وزیراعظم ہاؤس اسلام آباد میں وفاقی حکومت میں ادارہ جاتی اسٹریٹیجک اصلاحات کے حوالے سے اہم اجلاس کی صدارت کے موقع پر شرکاء سے گفتگو کرتے ہوئے کیا۔
وزیراعظم آفس پریس ونگ سے جاری بیان میں کہا گیاہے کہ وزیراعظم محمد شہباز شریف نے ہدایت کی کہ تمام وفاقی وزارتیں ان اصلاحات کے حوالے سے بھرپور تعاون کریں ۔ اجلاس کو اسٹریٹجک ریفارمز روڈ میپ پر تفصیلی بریفنگ دی گئی۔اجلاس کو بتایا گیا کہ وزیراعظم کی ہدایت کے مطابق ٹاسک مینیجمنٹ سسٹم کا نظام متعارف کروایا جا رہا ہے جس کا کام حتمی مراحل میں ہے ؛ وفاقی وزارتوں میں بین الاقوامی معیار کے ماہرین کی تعیناتی کے حوالے سے کام کا آغاز کر دیا گیا ہے ۔
اجلاس کو مزید بتایا گیا کہ وزارتوں اور دیگر وفاقی اداروں میں اہم عہدوں پر پروفیشنل افرادی قوت تعینات کی جائے گی ،ہر وزارت سیکٹورل پلانز ترتیب دے گی ،معاشی ترقی کی مقامی حکمت عملی ترتیب دینے کے حوالے سے ماہرین کی خدمات حاصل کی جائیں گی۔ اجلاس کو بتایا گیا کہ وفاقی وزارتوں کی کارکردگی کی جانچ کے لئے کی-پرفارمنس انڈیکیٹرز ترتیب دیے جائیں گے۔
اجلاس میں وفاقی وزیر اقتصادی امور احد خان چیمہ ، وفاقی وزیر خزانہ و محصولات محمد اورنگزیب ، وزیراعظم کے کوآرڈینیٹر رانا احسان افضل اور متعلقہ اعلیٰ سرکاری افسران نے شرکت کی ۔
حبیب شاہ
