سکھر،15 جون (اے پی پی): سندھ کے وزیر ٹرانسپورٹ شرجیل انعام میمن اور سیکرٹری ٹرانسپورٹ سندھ کی خصوصی احکامات پر محکمہ ٹرانسپورٹ نے زائد کرایوں کی وصولی کی شکایات کے سدباب کے لیے کارروائیاں کرتے ہوئے ۔زائد کرایہ وصول کرنے والے ٹرانسپورٹروں کو جرمانے عائد کردیئے ۔
آرٹی اے وسیم الدین میمن کی سربراہی میں ٹرانسپورٹ عملے نے سکھر روہڑی بائی پاس ، قومی شاہراہ اور دیگر مقامات پر کراچی سے پنجاب ، پشاور اورپنجاب سے کراچی جانے والی مسافر کوچز کی چیکنگ شروع کردی اور مسافروں کی شکایات پر کئی مسافر کوچز پر ہزاروں روپے کے جرمانہ عائد کیا اور مسافروں سے لیا گیا ہزاروں روپے کا اضافی کرایہ بھی واپس کرادیا۔
سیکرٹری آرٹی اے وسیم الدین میمن نے بتایا کہ اب تک ہم نے مختلف کارروائیوں کے دوران نہ صرف مسافر کوچز پر جرمانے عائد کیے ہیں بلکہ عید اپنوں میں کرنے کے لیے جانے والے مسافروں کو ان کا ہزاروں روپے کا لیا گیا اضافی کرایہ بھی واپس کروادیا ہے۔
