سکھر،10جون(اے پی پی): چیئرپرسن بینظیر انکم سپورٹ پروگرام ( بی آئی ایس پی ) روبینہ خالد سکھر اور خیرپور کے دورے پر پہنچیں۔ انہوں نے سکھر میں واقع بی آئی ایس پی بچل شاہ کیمپ سائٹ کا دورہ کیا۔ انہوں نے کیمپ سائٹ پر موجود خواتین سے ملاقات کی اور ان کے مسائل سنے اورمستحق خواتین کے مسائل کو فوری طور پر حل کرنے کیلئے متعلقہ افسران کو احکامات جاری کئے۔
اس موقع پر چیئرپرسن بینظیر انکم سپورٹ پروگرام ( بی آئی ایس پی ) روبینہ خالدنے کہا کہ پورے پاکستان میں 95 لاکھ سے زائد ہمارے بینیفیشری ہیں، ہم نے کیمپ سائیٹ کا اس دفعہ فیصلہ اس لئے کیا ہے کہ ہمیں بہت سی شکایتیں موصول ہوئی تھیں کہ قسط میں سے کٹوتی کی جا رہی ہے، دکاندار اپنی من مانی کر رہے ہیں اور کٹوتی کر رہے تھے ، ہم نے اس لیے کیمپ سائیٹ قائم کرنے کا فیصلہ کیا ہے جہاں ہمارا عملہ بھی موجود ہوتا ہے، جو غیر قانونی کٹوتی روکنے کی کوشش کر رہے ہیں۔
روبینہ خالد نے کہا کہ صاف اور شفاف ٹرانزیشن کو یقینی بنانے کیلئے کیمپ سائٹ کے بعد ہم انشاءاللہ بینک اکاؤنٹس کی طرف چلے جائیں گے ، اس کا مقصد ہے کہ لوگ ڈائریکٹ بینک جائیں پیسے وہاں سے لیں، یہ جو بیچ میں ریٹیلرز اور ایجنٹس ہیں ان کا کردار ختم ہو جائے۔
چیئرپرسن بینظیر انکم سپورٹ پروگرام ( بی آئی ایس پی ) روبینہ خالد نے کہا کہ بے نظیر انکم سپورٹ پروگرام کا ایک شعبہ وسیلہ روزگار بھی ہم شروع کرنے جا رہے ہیں تاکہ ہم لوگوں کو اچھی زندگی گزارنے کے لیے کوئی روزگار یا کوئی ٹریننگ دے سکیں۔انہوں نے کہا کہ ہم کوشش کر رہے ہیں کہ اگلی قسط بینکوں کے ذریعے دیں، اس سلسلے میں مختلف بینکوں کو بھی شامل کر رہے ہیں تاکہ زیادہ بینک ہوں، لوگوں کو مشکلات کا سامنا نہ کرنا پڑے ، بینکوں کے درمیان مقابلہ بھی بڑھے گا اس سے وہ اچھی سروس فراہم کریں گے۔
