لاہور،8جون (اے پی پی):وزیراعظم یوتھ پروگرام کے چیئرمین رانا مشہود احمد خان نے کہا ہے کہ پاکستان کا مستقبل روشن ہے ، اس کی ترقی میں ہم سب نے حصہ ڈالنا ہے، لاہور پیرس ریلی2024 پاکستان کے مثبت تشخص کو اجاگر کرے گی۔
ان خیالات کا اظہار انہوں نے ہفتہ کو یہاں الحمرا ہال میں لاہور پیرس ریلی2024 کے لوگو کی تقریب رونمائی سے خطاب کرتے ہوئے کیا۔ اس موقع پر موٹرسائیکلسٹ سیاح و ریلی آرگنائزر مکرم ترین بھی موجود تھے۔ رانا مشہود احمد نے کہا کہ لاہور پیرس ریلی 26اگست سے اپنے سفر کا آغاز کرے گی جس کی منزل پیرس فرانس ہوگی، ریلی کے شرکا پاکستان سے فرانس تک 12 ممالک سے ہوتے ہوئے 20 ہزار کلومیٹر سفر70 دنوں میں طے کریں گے۔ اس دوران ریلی پاکستان، ایران، ترکی، یونان، اٹلی، سوئٹزرلینڈ، فرانس، جرمنی، آسٹریا، ہنگری، رومانیہ اور بلغاریہ جیسے بڑے ممالک سے گزرے گی۔ ریلی کا اہتمام گلوب سیریز، کراس روٹ کلب نے وزیراعظم یوتھ پروگرام اور محکمہ سیاحت پاکستان کے باہمی اشتراک سے کیا ہے۔
رانا مشہود احمد خاں کا کہنا تھا کہ لاہور پیرس ریلی نہ صرف ملکی ثقافت کو فروغ دینے کا ذریعہ ہے بلکہ یہ پاکستان کے مثبت امیج کو اجاگر کرنے کا بھی ایک بہترین موقع ہے۔انہوں نے ریلی کے شرکا کو حکومتی سطح پر مکمل تعاون اور وسائل کی فراہمی کی یقین دہانی کرائی۔انہوں نے کہا کہ جن ممالک سے ریلی گزرے گی وہاں اس کا شاندار استقبال کیا جائے گا۔ ریلی میں شریک خواتین اور بچوں سمیت تمام شرکا کے لئے حفاظتی اقدامات کو یقینی بنایا جائے گا ۔انہوں نے کہا کہ اس ریلی کے ذریعے نہ صرف ثقافتی روابط مضبوط ہوں گے بلکہ مختلف ممالک کے درمیان دوستانہ تعلقات بھی فروغ پائیں گے۔
رانا مشہود احمد خان نے کہا کہ یہ ریلی ہمارے نوجوانوں کو ایک نیا عزم اور جوش دینے کا سبب بنے گی، یہ ریلی جہاں پاکستان کاایک منفرد تشخص برقرار رکھے گی وہاں یہ پاکستان میں سیاحت کے نئے باب کھولنے میں مددگار ثابت ہو گی۔ انہوں نے کہا کہ ہم پوری دنیا کے سیاحوں کو اس ریلی کے ذریعے دعوت دیتے ہیں کہ وہ پاکستان آئیں یہ ایک پرامن ملک ہے یہاں کے لوگ بہت ہی مہمان نواز ہیں اور یہ خطہ سیاحوں کیلئے جنت ہے ۔ ریلی میں پاکستان کی ثقافت پر مبنی فلوٹس بھی بنائے جائیں گے۔ ریلی جس ملک میں جائے گی وہاں ثقافتی پروگرام منعقد کئے جائیں گے تاکہ دنیا کو پاکستان کے مثبت امیج سے آگاہ کیا جائے۔انہوں نے کہاکہ حکومت سیاحت کے فروغ اور اسے پرکشش سیاحتی مقام بنانے کے لئے پرعزم ہے۔ انہوں نے ریلی کے شرکا سے کہا کہ آپ پاکستان کے سفیر اور ہیروز ہیں پاکستان کے بارے میں جو کچھ کہا جاتا ہے اس کا موثر جاب دینے کیلئے آپ جارہے ہیں۔
رانا مشہود احمد خان نے کہا کہ مہنگائی کم اور معیشت میں مثبت اعشاریے چل رہے ہیں، سرمایہ کاری کے لئے پوری دنیا کا رخ پاکستان کی طرف ہو رہا ہے ۔
