لاہور،04جون(اے پی پی):وزیراعظم محمد شہباز شریف چین کے پانچ روزہ سرکاری دورے پر روانہ ہوگئے۔ نائب وزیراعظم و وزیر خارجہ محمد اسحاق ڈار ، وزیر دفاع خواجہ محمد آصف ، وفاقی وزیر منصوبہ بندی احسن اقبال ، وزیر خزانہ و محصولات محمد اورنگزیب، وفاقی وزیر پٹرولیم مصدق ملک اور وفاقی وزیر اطلاعات و نشریات عطاء اللہ تارڑ بھی وزیراعظم کے ہمراہ ہیں ۔
وزیراعظم محمد شہباز شریف چینی صدرشی جن پھنگ اورچینی وزیرِ اعظم لی چیانگ کی خصوصی دعوت پر 4 سے 8 جون تک چین کا پانچ روزہ سرکاری دورہ کر رہے ہیں۔ وزیرِ اعظم کا دورہءِ چین، چین پاکستان اقتصادی راہداری کے دوسرے مرحلے اور پاکستان چین اسٹریٹجک و اقتصادی تعلقات کے مزید فروغ کیلئے انتہائی اہمیت کا حامل ہے۔ وزیرِ اعظم اپنے دورے کے پہلے مرحلے میں چینی شہر شینزن جائیں گے۔ وزیرِ اعظم دونوں ممالک کی کاروباری شخصیات اور سرمایہ کاروں کے مابین شراکت داری کے فروغ کیلئے چین کے شہر شینزن میں بزنس فورم میں شرکت کریں گے۔ مزید برآں وزیرِ اعظم چینی ون ونڈو آپریشن کے مشاہدے کیلئے نانشان ون ونڈو اور ہواوے کے ہیڈ کوارٹرز کا دورہ بھی کریں گے۔ وزیراعظم دورے کے دوسرے مرحلے میں بیجنگ جائیں گے جہاں ان کی چین کی اعلیٰ قیادت سے ملاقات ہوگی۔ وزیرِ اعظم چینی صدر شی جن پھنگ اور چینی ہم منصب لی چیانگ سے ملاقاتیں کریں گے۔ وزیرِ اعظم چین اور پاکستان کے مابین مختلف شعبوں میں تعاون کی مفاہمتی یادداشتوں پر دستخط کی تقریب میں شرکت کریں گے۔ اس کے علاوہ وہ اعلیٰ سرکاری عہدیداران،مختلف کمپنیوں کےسربراہان اورچینی سرمایہ کاروں سے ملاقاتیں بھی کریں گے۔ بیجنگ میں وزیرِ اعظم عوامی یادگار (پیپلز مانومنٹ) کا دورہ بھی کریں گے۔ وزیرِ اعظم اپنے دورہءِ چین کے آخری مرحلے میں چینی شہر شیان جائیں گے جہاں مقامی قیادت سے ملاقاتوں کے ساتھ ساتھ وزیرِ اعظم چین کی زرعی ترقی میں جدید ٹیکنالوجی کے استعمال کے مشاہدے کیلئے ماڈل فارمز و گرین ٹیکنالوجی کمپنیوں کا دورہ کریں گے۔ دورے کے دوران پاکستان اور چین کے مابین نہ صرف سی پیک کے دوسرے مرحلے، اسٹریٹجک شرکت داری بلکہ تجارت و سرمایہ کاری،دفاع، قومی و علاقائی سلامتی، توانائی، خلائی تحقیق،سائنس و ٹیکنالوجی،تعلیم و ہنر اور ثقافتی شعبے میں تعاون کے فروغ پر گفتگو ہوگی۔ بیان کے مطابق وزیرِ اعظم شہباز شریف کا دورہء چین دونوں ممالک کی شراکت داری کو مزید مثبت سمت دینے میں اہم سنگ میل ثابت ہوگا۔
