اسلام آباد،11جون (اے پی پی):وزیراعظم محمد شہباز شریف نے صوبائی حکومتوں کو انسداد بجلی چوری مہم میں بھرپور ساتھ دینے اور بجلی چوروں کو قرار واقعی سزائیں دینے، اوور بلنگ کے سدباب اور تقسیم کار کمپنیوں میں صارفین کی سہولت کے لیے موثر اور متحرک نظام قائم کرنے کی ہدایت کرتے ہوئے کہا ہے کہ بڑھتی ہوئی گرمی کے پیش نظر ملک میں کم سے کم لوڈشیڈنگ کی جائے۔
انہوں نے یہ ہدایت منگل کو یہاں بجلی کی لوڈ شیڈنگ، بجلی چوری کی روک تھام اور توانائی کے شعبے میں اصلاحات کے حوالے سے جائزہ اجلاس کی صدارت کرتے ہوئے کی۔ اجلاس میں وفاقی وزیر برائے اقتصادی امور احد خان چیمہ، وفاقی وزیر توانائی سردار اویس لغاری، وفاقی وزیر پٹرولیم ڈاکٹر مصدق ملک، وزیراعظم کے کوآرڈینیٹر رانا احسن افضال اور متعلقہ وزارتوں کے اعلیٰ افسران نے شرکت کی۔ اجلاس میں ملکی سطح پر بجلی کی طلب و رسد اور لوڈ شیڈنگ کے رجحانات کے حوالے سے بریفنگ دی گئی۔
وزیراعظم نے ہدایت کی کہ بجلی کی عدم فراہمی سے متعلق شکایت کے بروقت اندراج کے لیے تقسیم کار کمپنیوں میں صارفین کی سہولت کے لئے مؤثر اور متحرک نظام قائم کیا جائے، بڑھتی ہوئی گرمی کے پیش نظر ملک میں کم سے کم لوڈ شیڈنگ کی جائے، نئے ٹرانسفارمرز کی خریداری صرف اور صرف بین الاقوامی معیار کی خصوصیات کے مطابق ہو، توانائی کے شعبے میں اصلاحات کے لیے عالمی سطح پر رائج جدید نظام سے استفادہ کیا جائے، صوبائی حکومتیں انسداد بجلی چوری مہم میں بھرپور ساتھ دیں اور بجلی چوروں کو قرار واقعی سزائیں دی جائیں، اوور بلنگ کا سدباب کیا جائے۔
اجلاس کو بتایا گیا کہ اوور بلنگ کے ضمن میں یکم اپریل سے 30 مئی تک 134 مقدمات درج اور 90 ملازمین کو گرفتار کیا جا چکا ہے۔ اجلاس میں وزیراعظم کو نیشنل ٹرانسمیشن اینڈ ڈسپیچ کمپنی کی تنظیم نو کے عمل میں اب تک کی پیشرفت کے حوالے سے بریفنگ دی گئی۔ اجلاس کو بتایا گیا کہ توانائی کے شعبے میں اصلاحات کے سلسلے میں آئندہ سال کے ترقیاتی بجٹ میں 124611 ٹرانسفارمرز کی میٹرنگ کا منصوبہ بھی شامل کیا گیا ہے، ایشیائی ترقیاتی بینک کے تعاون سے آئیسکو کے ایک تہائی صارفین سمارٹ میٹرز پر منتقل کیے جا رہے ہیں، بعد ازاں اس منصوبے کا دائرہ کار ملک کے دیگر علاقوں تک بڑھایا جائے گا۔ اجلاس کو بتایا گیا کہ بہتر ریکوری والے علاقے لوڈشیڈنگ فری جبکہ بجلی محکموں کے نادہندہ اور بجلی چوری کے علاقوں میں صرف جزوی لوڈشیڈنگ کی جا رہی ہے۔
اجلاس میں وزیراعظم کو انسداد بجلی چوری مہم کی اب تک کی پیشرفت کے حوالے سے بھی آگاہ کیا گیا۔ اجلاس کو بتایا گیا کہ صوبائی حکومتوں کے تعاون سے انسداد بجلی چوری مہم کامیابی سے جاری ہے، انسداد بجلی چوری مہم میں 7 ستمبر 2023 سے اب تک 160004 ایف آئی آر درج، 79885 لوگ گرفتار اور 448 ملازمین معطل کیے جا چکے ہیں۔
