اسلام آباد، جون 25 (اے پی پی): وزیراعظم محمد شہباز شریف سے منگل کے روز ملاقات میں نوجوان انٹرپرنیورز کے وفد نے ملاقات میں مختلف شعبوں میں پاکستانی کاروباری برادری کی عالمی اور ملکی سطح پر کامیابیوں کے حوالے سے آگاہ کرتے ہوئے پاکستان سٹاک ایکسچینج کی تاریخ ساز کامیابی پر وزیراعظم کو خراج تحسین پیش کیا۔
وفد نے وزیر اعظم کو کاروباری برادری کو درپیش مختلف مسائل سے بھی آگاہ کیا جس پر وزیراعظم نے اقتصادی مشاورتی کمیٹی کی طرز پر نوجوان کاروباری افراد پر مشتمل یوتھ انٹرپرنیور ایڈوائزری کمیٹی تشکیل دینے کی ہدایت کی۔
وفد میں ٹیکسٹائل ، تعمیرات، آئل اینڈ گیس، تعلیم، صحت، لاجسٹکس، زراعت، برآمدات اور دیگر شعبوں سے تعلق رکھنے والے نوجوان کاروباری افراد شامل تھے۔
وفد سے ملاقات میں شہباز شریف نے نوجوان کاروباری افراد کو مستقبل کے معمار قرار دیتے ہوئے ان کی کاوشوں کو سراہا اور کہا کہ پاکستان میں نوجوانوں کی بڑی تعداد کو باصلاحیت افرادی قوت میں تبدیل کر کے ملکی معیشت کو متحرک کیا جا سکتا ہے۔
وزیر اعظم نے مزید کہا کہ چین اور پاکستان کے مابین کاروباری اشتراک کا فروغ ہماری اولین ترجیح ہے، چین-پاکستان اقتصادی راہداری منصوبے کے دوسرے مرحلے میں صنعتی ترقی کی رفتار تیز ہو جائگی اور پاکستانی برآمدات کو عالمی سطح پر فروغ دینا ملکی معیشت کے لیے ناگزیر ہے۔
اجلاس میں وفاقی وزیر تجارت جام کمال، وفاقی وزیر اطلاعات و نشریات عطا اللہ تارڑ، وفاقی وزیر توانائی سردار اویس احمد خان لغاری، وفاقی وزیر برائے نجکاری عبد العلیم خان، چیئرمین پرائم منسٹر یوتھ پروگرام رانا مشہود احمد خان، وفاقی وزارتوں کے سیکرٹریز اور متعلقہ اداروں کے اعلیٰ افسران شریک تھے۔
