لاہور، 26 جون (اے پی پی): وزیراعلیٰ پنجاب مریم نوازشریف نے پنجاب ڈیزاسٹر مینجمنٹ اتھارٹی ہیڈ آفس کا دورہِ کیا اور سیلاب کے خدشے کے پیش نظر اضلاع سے ڈیلی رپورٹ طلب کی۔
اس موقع پر سیکرٹری اریگیشن،چیف میٹرالوجسٹ،ڈی جی پی ڈی ایم اے نے مریم نواز کو تفصیلی بریفنگ دی۔ وزیر اعلیٰ مریم نواز شریف نے پنجاب بھر میں ندی نالوں کی بھرپور صفائی کا حکم دیا،انہوں نے ہدایت کی کہ ممکنہ بارشوں کے پیش نظر ڈرین کی بھرپور صفائی کی جائے۔
وزیر اعلیٰ پنجاب نے ممکنہ سیلاب کے خدشے کےپیش نظر اضلاع سے ڈیلی رپورٹ طلب کرنے کے علاوہ متاثرہ علاقوں میں عوام کو انخلاء کے پلان سے آگاہ کرنے کی بھی ہدایت کی۔
وزیر اعلیٰ نے متاثرہ دیہات کے لوگوں کو قیام و طعام کے مقام سے متعلق آگاہ کرنے کی ہدایت بھی کی،ان کا کہنا تھا کہ کے ندی نالوں میں تجاوزات اوررکاوٹیں ہٹائی جائیں جبکہ ممکنہ سیلا ب کے خطرے کے پیش نظر آبادی کے بروقت انخلا کی پلاننگ کی جائے۔
مریم نواز نے کہا کہ انسانی جانوں کے ساتھ ساتھ مال مویشی کوبھی بروقت نکالاجائے۔دنیا بھر میں ارلی فلڈ وارنگ سسٹم رائج ہے،پاکستان میں کیوں پتہ نہیں چلتا۔
مریم نوازشریف نے کہا کہ بارشوں کی صورت میں ہر شہر میں پانی کی فوری نکاسی کااہتمام کیا جائے۔ جہاں بھی سیلاب کا خطرہ ہوبروقت پیشگی اقدامات کیے جائیں۔
وزیر اعلیٰ مریم نوازشریف نے کہا کہ سیلاب کی بروقت اورمستند اطلاعات کی ترسیل یقینی بنائی جائے۔ ہرسیلابی بندسے تجاوزات ہٹائی جائیں اور مانیٹرنگ تسلسل سے جاری رہنی چاہیے۔
اجلاس میں تمام بیراج لنک کنال،مین کنال، ڈریننگ سسٹم اوربند وغیرہ کی صورتحال پر رپورٹ پیش کی گئی۔ وزیر اعلیٰ پنجاب کو بریفننگ میں بتایا گیا کہ 3ماہ میں پاکستان میں نارمل اورنارمل سے زیادہ بارشیں متوقع ہیں۔
وزیراعلیٰ مریم نوازشریف نے پی ڈی ایم اے کے مرکزی کنٹرول روم کا دورہ بھی کیا ۔ وزیراعلیٰ مریم نوازشریف نے ویدرپورٹل،فلڈ فارکاسٹنگ ڈویژن،فلڈ سمولیشن ماڈل کا بھی مشاہدہ کیا۔
سینئر صوبائی وزیر مریم اورنگزیب،صوبائی وزراء خواجہ سلمان رفیق،خواجہ عمران نذیر،کاظم پیرزادہ،ایم پی اے ثانیہ عاشق،چیف سیکرٹری زاہد اختر زمان،ایس ایم بی ار،سیکرٹریز، ڈی جی پی ڈی ایم اےعرفان علی کاٹھیا و دیگر متعلقہ حکام بھی موجود تھے۔
