اسلام آباد۔27جون(اے پی پی): وفاقی وزیر برائے نجکاری ،سرمایہ کاری بورڈ و مواصلات عبدالعلیم خان سے آج آذربائیجان کے سفیر خضر فرادوف نے ملاقات کی جس میں باہمی دلچسپی کے امور پر تفصیلی تبادلہ خیال کیا گیا جبکہ وفاقی وزیر نے آذربائیجان کے سفیر کو اپنے حالیہ دورہ سینٹرل ایشیا سے بھی آگاہ کیا۔
اس موقع پر بات کرتے ہوئے وفاقی وزیر سرمایہ کاری بورڈ عبدالعلیم خان کا کہنا تھا کہ پاکستان سینٹرل ایشیاء کے تمام ممالک سے دو طرفہ تجارت اور کاروباری روابط کا فروغ چاہتا ہے، وسط ایشیائی ممالک بھی پاک چین اکنامک کوریڈور سی پیک سے مستفید ہوں ۔
اس موقع پر آذربائیجان کے سفیر خضر فرادوف کا وفاقی وزیر عبدالعلیم خان سے دو طرفہ تعاون کی پیشکش پر اظہار تشکر کرتے ہوئے کہا کہ پاکستان سے آذربائیجان میں پیشہ وارانہ مہارت اور مین پاور کی خاصی گنجائش موجود ہے دونوں ممالک مختلف شعبوں میں دو طرفہ تعاون میں اضافہ کریں گے۔
ملاقات کے دوران فریقین کے مابین آذربائیجان کے صدر کے دورہ پاکستان پر بھی تفصیلی تبادلہ خیال کیا گیا ۔
