اسلام آباد، 13 جون (اے پی پی): وزیرِ اعظم محمد شہباز شریف کی زیرِ صدارت ٹیکس اصلاحات، معیشت کی ڈیجیٹائیزیشن اور محصولات میں اضافے کیلئے اقدامات پر اعلیٰ سطحی جائزہ اجلاس جمعرات کے روز منعقد ہوا جس میں وزیر اعظم نے ایف بی آر کی ہیومن ریسورس کی ترقی اور ڈیجیٹائز یشن کے لئے تمام وسائل مہیا کرنے کا اعادہ کیا۔
شہباز شریف نے کہا کہ ایف بی آر ملکی معیشت کا اہم ترین پہیہ ہے، ٹیکس چوروں اور ٹیکس نادہندگان اور انکی معاونت کرنے والے عناصر کا سد باب کر کے چھوڑیں گے اور بجٹ کی تیاری کے دوران میں نے واضح ہدایت دیں کہ اشرافیہ کو ٹیکس دینا ہی ہوگا۔
وزیرِ اعظم نے کہا کہ کہ حکومت نے حالیہ بجٹ میں غریب و متوسط طبقے پر کم سے کم ٹیکس عائد کیا، ہماری اولین ترجیح ٹیکس کی شرح کو کم جبکہ ٹیکس دہندگان کی تعداد میں اضافہ ہے، اسی لیے ٹیکس دینے کے اہل افراد کو جلد سے جلد ٹیکس نیٹ میں لانے کیلئے اقدامات کر رہے ہیں۔
وزیراعظم کو ایف بی آر کی ڈیجیٹائزیشن اور محصولات میں اضافے کے حوالے سے گزشتہ چار ہفتوں میں کی گئی پیشرفت کے ساتھ ساتھ محصولات بڑھانے کے حوالے سے قلیل مدتی اور وسط مدتی پلان کی بھی بریفنگ دی گئ۔
