اسلام آباد،26 جون(اے پی پی): وزیراعظم محمد شہباز شریف نے کہا ہے کہ پاکستان میں اندرونی و بیرونی سرمایہ کاری کا فروغ حکومت کی اولین ترجیح ہے، حکومت تاجروں اور سرمایہ کاروں کے لئے کاروبار دوست ماحول فراہم کرنے کے لیے ہر ممکن اقدامات اٹھا رہی ہے۔
ان خیالات کا اظہار وزیراعظم محمد شہباز شریف نے سرمایہ کاری بورڈ کے امور پر اہم اجلاس کی صدارت کرتے ہوئے کیا۔اجلاس میں وزیراعظم نے چینی صنعتوں کی پاکستان منتقلی کے حوالے سے چینی اور پاکستانی کمپنیوں کے درمیان جوائنٹ وینچر منصوبے کی منظوری دی۔
وزیراعظم نے اپنے دورہء چین کے دوران شینزین میں پاکستانی اور چینی کمپنیوں کے درمیاں مفاہمتی یادداشتوں کے حوالے سے پیشرفت پر جامع رپورٹ پیش کرنے کی ہدایت کی اور خصوصی اقتصادی زونز ون اسٹاپ شاپ کے قانون کے مسودہ پر دورہء چین کے بعد ہونے والی پیشرفت کے تناظر میں نظر ثانی کی ہدایت کی۔وزیراعظم نے کہا کہ چین کی ٹیکسٹائل ، چمڑے ، فٹ وئیر اور دیگر صنعتوں کی پاکستان میں ری لوکیشن کے حوالے سے بہت استعداد موجود ہے۔
اجلاس میں وفاقی وزیر نجکاری و سرمایہ کاری عبد العلیم خان ، وفاقی وزیر تجارت جام کمال، وفاقی وزیر خزانہ و محصولات محمد اورنگزیب، وفاقی وزیر پٹرولیم ڈاکٹر مصدق ملک، وزیراعظم کے کوآرڈینیٹر رانا احسان افضل اور متعلقہ اعلیٰ سرکاری افسران نے شرکت کی۔
