لاہور، 13 جون (اے پی پی): وزیراعلیٰ مریم نواز کی زیر صدارت پنجاب کابینہ کا اجلاس منعقد ہوا جس میں پنجاب کابینہ نے پنجاب کی تاریخ کے سب سے بڑے ٹیکس فری 5446ارب روپے کے بجٹ 25-2024 کو پیش کرنے کی منظوری دیدی۔
وزیراعلیٰ مریم نواز کا کہنا ہے کہ پنجاب حکومت نے مالی سال 2024-25 بجٹ میں عوام کیلئے آسانیاں پیدا کرنے کی کوشش کی ہے- نئے بجٹ میں کوئی نیا ٹیکس نہیں نہ ہی موجودہ ٹیکسز کی شرح میں اضافہ ہوا۔ ٹیکس بڑھائے بغیر مالیاتی ذرائع سے ریونیو میں 53 فیصد کا اضافہ ہوا ہے۔
اجلاس نے 842 ارب روپے ڈویلپمنٹ اخراجات، 630ارب کے سرپلس بجٹ کی منظوری دی، سالانہ ڈویلپمنٹ پلان میں 77 نئے میگا پراجیکٹ شامل ہوں گے۔
اجلاس نے پنجاب کی تاریخ کے سب سے بڑے ترقیاتی پیکیج کی بھی منظوری دی۔ صوبائی کابینہ نے 842ارب روپے کے ریکارڈ ترقیاتی بجٹ کی منظوری دی۔ سابقہ ریونیو ہدف 625ارب روپے جبکہ موجودہ ریونیو ہدف 960 ارب روپے مقرر کیا گیا۔ 960 ارب ریونیو صوبہ اپنے ذرائع سے اکٹھا کرے گا ۔ کابینہ نے کم ازکم اجرت 32ہزار سے بڑھا کر 37ہزار روپے کر نے کی منظوری دی اور تنخواہوں میں 20 سے 25فیصد اور پنشن میں 15فیصد اضافے کی منظوری دی۔ مینارٹی ڈویلپمنٹ فنڈ میں پہلی مرتبہ ایک ارب روپے کا ریکارڈ اضافہ کیا گیا۔
کابینہ نے گندم کے قرض 375ارب روپے کی ادائیگی کی منظوری دی جبکہ سود کی مد میں 54ارب سے زائد بچت ہوگی۔ لیپ ٹاپ سکیم کے لئے 6ارب روپے اورپی کے ایل آئی انڈومنٹ فنڈ کے لئے 5ارب روپے کی منظوری دی۔ کابینہ نے سوشل پروٹیکشن کیلئے 130 ارب روپے مختص کیے جس میں 110ارب روپے کا ریکارڈ اضافہ کیا گیاہے۔
کابینہ کو بریفنگ میں بتایا گیا کہ پنجاب نے ایف بی آر ٹارگٹ سے 36 فیصد زیادہ ٹیکس اکٹھا کیا۔ کابینہ نے 2023-24 بجٹ کی سپلیمنٹری گرانٹ کیلئے 268 ارب روپے منظور کئے اور مالی سال-24 2023کے سپلیمنٹری بجٹ سٹیٹمنٹ کی منظوری بھی دی۔ زرعی آلات کیلئے 26 ارب، کسان کارڈ 10 ارب، سی ایم گرین ٹریکٹر پروگرام 30 ارب، سی ایم ڈسٹرکٹ ایس جی ڈی پروگرام کیلئے 80 ارب روپے کی منظوری دی گئی۔ صوبائی کابینہ نے لاہور ڈویلپمنٹ کیلئے 35 ارب، مری کے لئے 5ارب، لائیو سٹاک کارڈ کیلئے 2 ارب، ہمت اور نگہبان کارڈ کیلئے 2ارب، ری سٹرکچرنگ ایجوکیشن کیلئے 26ارب روپے کی منظوری دی۔
وزیر اعلیٰ پنجاب نے کہا کہ پنجاب کی فنانشل پاکٹ کو بڑھانا چاہتے ہیں، عوام پر بوجھ نہیں ڈالیں گے- بجٹ میں عوام پر کوئی نیا ٹیکس نہیں لگا رہے، اپنے ذرائع سے ریونیو بڑھا رہے ہیں –
مریم نوازشریف نے کہا کہ میری کابینہ اور ٹیم دن رات کام کررہی ہے۔ اپنے وعدوں او رترقیاتی منصوبوں کی تکمیل کے لئے دن رات ایک کریں گے-مریم نوازشریف نے کہا کہ کارکردگی پر ہی ڈی سی کی تعیناتی ہوگی، مسلسل مانیٹرنگ کررہے ہیں -پنجاب میں فراہمی او رنکاسی آب کے لئے ایک ہی ڈیپارٹمنٹ قائم کیاجائے گا- کابینہ نے 3ماہ میں ریکارڈ مہنگائی کم ہونے پر وزیراعلیٰ مریم نوازشریف کو خراج تحسین پیش کیا۔ مریم نواز نے کہا کہ پورے پنجاب کو سیف سٹی بنایاجائے گا، تمام شہر کیمروں سے کور ہوں گے-
انھوں نے کہا کہ گندم خریداری سے بچائے پیسے کاشتکار پر خرچ کریں گے- جنوبی پنجاب کے فارمر کو خصوصی طورپر مویشی دئیے جائیں گے- رورل ہیلتھ پر کبھی توجہ نہیں دی گئی،پہلی مرتبہ تمام مراکز صحت ریویمپ ہورہے ہیں -فیلڈ ہسپتالوں، گھروں میں ادویات کی فراہمی اور ہسپتالوں میں مفت ادویات سے عوام خوش ہیں –
مریم نوازشریف نے کہا کہ اپنی چھت اپنا گھر پروگرام کے تحت 5مرلے تک لوگوں کو گھر بنانے کے لئے فنڈنگ دیں گے۔ انھوں نے کہا کہ نواز شریف صاحب ہماری محنت کو دیکھ کر بہت خوش ہوتے ہیں۔ نواز شریف صاحب کہتے ہیں اللہ تعالیٰ نے ہمارا کا ہاتھ پکڑ لیا ہے۔
وزیراعلیٰ مریم نوازشریف او رکابینہ نے سینئر منسٹر مریم اورنگزیب اور وزیر اطلاعات عظمیٰ زاہد بخاری کی خدمات کو خراج تحسین پیش کیا۔ وزیراعلیٰ پنجاب نے سیکرٹری فنانس مجاہد شیردل، پرنسپل سیکرٹری ساجد ظفر ڈال، پی ایس او علی اعجاز، سیکرٹری شعیب مرزا،میڈیا ٹیم اور دیگر کو بھی شاباش دی۔ اجلاس میں صوبائی وزراء، معاون خصوصی، چیف سیکرٹری، آئی جی پنجاب، سیکرٹریز اور دیگر متعلقہ حکام نے شرکت کی۔
