لاہور، 15 جون (اے پی پی): پٹرولیم مصنوعات کی قیمتیں واضح کم ہونے کے باوجود ٹرانسپورٹ کرایوں میں کمی نہ ہونے پر وزیراعلیٰ پنجاب مریم نواز نے سخت برہمی کا اظہار کیا۔ وزیراعلیٰ پنجاب مریم نوازنے چھٹی کے روز بھی اجلاس بلالیا، اجلاس میں پٹرولیم مصنوعات کی قیمتوں میں کمی کا حقیقی ریلیف عوام تک پہنچانے کے حوالے سے معاملات زیر غور آئے۔
مریم نواز نے پٹرول کی قیمت میں 35 روپے کمی کے باوجود ٹرانسپورٹ کرایوں میں کمی نہ ہونے پر برہمی کا اظہار کیا، انہوں نے وزارت ٹرانسپورٹ اور پولیس کو ٹرانسپورٹ کرایوں میں فوری کمی کے لئے آپریشن شروع کرنے کی ہدایت کی۔
وزیراعلیٰ پنجاب نے شکایات اور معائنہ کمیشن کوبھی فوری اقدامات کی ہدایات کرتے ہوئے کہا کہ پٹرول میں کمی کا بڑا ریلیف کرایوں میں کمی کی صورت عوام کو پہنچایا جائے، روٹی اور کرایوں سمیت دیگر اشیاء کی قیمتوں کو سرکاری نرخوں پر قائم رکھنے کو یقینی بنایا جائے، انھوں نے کہا کہ اس سلسلے میں کوتاہی برداشت نہیں ہوگی۔
وزیراعلیٰ نے ہدایت دی کہ بڑی عید پر صفائی کا معیار وہی ہونا چاہیے جو وزیراعلی شہبازشریف کے دور میں تھا، عید قرباں پر الائشوں کی بروقت صفائی، مویشی منڈیوں میں دھوپ سے بچاﺅ کے لئے شیڈز کی فراہمی کی فوری ہدایت کی۔ پہلی بار32 لاکھ خصوصی تھیلے بھی عوام میں تقسیم کرنے کا آغاز کردیاگیا۔ حکومت کے فراہم کردہ پلاسٹک سے پاک تھیلوں میں عوام قربانی کا گوشت تقسیم کرسکیں گے۔
وزیراعلیٰ نے مویشی منڈیوں میں ڈاکٹرز کی فراہمی اور پانی سمیت دیگر ضروری سہولیات کی دستیابی کی بھی ہدایت دی۔
تعطیلات کے دوران نہروں پر عوام کی جان کی حفاظت کے لئے لائف گارڈز کی تعیناتی کی بھی ہدایت کی۔ وزیراعلیٰ نے ٹریفک کا موثر پلان بنانے اور عوام کو ٹریفک جام سے بچانے کے لئے اقدامات کرنے کی بھی ہدایت دی۔
وزیر اعلیٰ نے صوبے بھر میں امن وامان یقینی بنانے کے لئے بھی سخت اقدامات کی ہدایت دی۔وزیراعلیٰ پنجاب نے کہا کہ تعطیلات کے دوران بھی تمام صورتحال کی ذاتی طورپر نگرانی کروں گی۔اجلاس میں صوبائی سیکریٹریز ، پولیس اور انتظامیہ کے اعلیٰ حکام نے شرکت کی۔
