لاہور،12 جون( اے پی پی): چئیرمین پاکستان کرکٹ بورڈ محسن نقوی نے قذافی سٹیڈیم کا دورہ کیا اور اسٹیڈیم کی اپ گریڈیشن کے لئے جاری کاموں کا جائزہ لیا اور رات گئے کام بند ہونے پر ناراضگی کا اظہار کیا۔
چئیرمین پی سی بی محسن نقوی نے چوبیس گھنٹے کام کرنے کے احکامات دیے اور کہا کہ چوبیس گھنٹے کام کرکے ہی اس بڑے پراجیکٹ کو وقت پر مکمل کیا جا سکتا ہے۔انہوں نے کہا کہ اسٹیڈیم کی مرکزی عمارت کے نیچے پائپ پھٹنے کے باعث جمع پانی کی جلد نکاسی یقینی بنائی جائے، کام کی رفتار کو تیز کیا جائے۔
محسن نقوی نے کہا کہ چیمپئنز ٹرافی ٹورنامنٹ سے قبل سٹیڈیم کی اپ گریڈیشن کا کام مکمل کرنے کے لیے مزید وسائل بروئے کار لانے کی ضرورت ہے۔چئیرمین پی سی بی محسن نقوی نے جاری کاموں کا معائنہ کیا اور ضروری ہدایات دیں۔
اس موقع پر ڈائریکٹر انٹرنیشنل کرکٹ اور جنرل مینجر انفراسٹرکچر بھی موجود تھے۔
