شینزین (چین)، 05 (اے پی پی)؛ وفاقی وزیر اطلاعات عطاءاللہ تارڑ نے بدھ کو یہا ں میڈیا سے گفتگو کرتے ہوئے کہا کہ چین اور پاکستان کے درمیان تعلقات ایک نئے دور میں داخل ہو رہے ہیں جو پاکستانی معیشت کے لئے اہم سنگ میل ہیں۔
عطا تارڑ نے کہا کہ وزیراعظم شہباز شریف سی پیک کے اندر ایک نئی جدت لے کر آئے ہیں انکے وژن کے تحت سی پیک میں ایک نئے دور کا آغاز ہو رہا ہے، اور اس سلسلے میں شینزن میں بزنس ٹو بزنس کانفرنس میں 500 سے زائد پاکستانی اور شینزین کی کاروباری شخصیات نے شرکت کی اور یہ بزنس ٹو بزنس ملاقاتیں اور کانفرنس پاکستان کی معیشت کے استحکام اور ترقی میں اپنا بھرپور کردار ادا کریں گی۔عطا تارڑ نے مزید بتایا کہ موبائل فون مینوفیکچرنگ پلانٹ کے اونر سے بھی ملاقات ہوئی، ان کی فیکٹری پاکستان میں کام کر رہی ہے، یہ پاکستان سے ایکسپورٹ کریں گے اور الیکٹرک وہیکلز کے حوالے سے بھی گفتگو ہو رہی ہے۔وزیراطلاعات نے آگاہ کیا کہ وزیراعظم شہباز شریف بیجنگ میں چینی قیادت سے بھی ملاقات کریں گے۔
