بیجنگ، 7 جون (اے پی پی): وزیراعظم محمد شہباز شریف اور چین کی نیشنل پیپلز کانگریس کی قائمہ کمیٹی کے چیئرمین ژاؤ لیجی کے درمیان جمعہ کو بیجنگ میں ملاقات ہوئی جس میں وزیراعظم نے چیئرمین ژاؤ کو چینی سیاست اورمعاشرے کے لئے انکی خدمات پر زبردست خراج تحسین پیش کرتے ہوئے نیشنل پیپلز کانگریس کے سالانہ اجلاس کے کامیاب انعقاد پر مبارکباد دی۔
وزیراعظم نے کہا کہ کمیونسٹ پارٹی آف چائنہ (سی پی سی) اور نیشنل پیپلز کانگریس (این پی سی) میں ایک اہم عہدہ ژاؤ لیجی پر چینی قیادت اور عوام کی طرف سے ان پر کئے گئے اعتماد کو ظاہر کرتا ہے ۔
وزیراعظم نے مزید کہا کہ چین کے ساتھ مضبوط تعلقات پاکستان کی خارجہ پالیسی کی بنیاد ہیں اور دونوں ممالک کے درمیان منفرد اور خصوصی تعلقات اسٹریٹجک اعتماد، مشترکہ نظریات اور عملی تعاون پر مبنی ہیں۔
چیئرمین ژاؤ لیجی نے کہا کہ صدر شی جن پنگ کی رہنمائی کے تحت چین پاکستان کے ساتھ پائیدار شراکت داری کو مزید مستحکم کرنے کے لیے پرعزم ہے۔
دونوں فریقوں نے ایک دوسرے کے بنیادی مفادات کی حمایت کا اعادہ کیا۔ انہوں نے اعلیٰ سطح کے تبادلوں میں مثبت رفتار کا ذکر کیا اور دونوں ممالک کے درمیان گہری دوستی کو مزید مضبوط و مستحکم کرنے کے لیے اس رفتار کو برقرار رکھنے کی ضرورت پر زور دیا۔
پاکستان کی اقتصادی ترقی میں چین، پاکستان اقتصادی راہداری کے اہم کردار کو اجاگر کرتے ہوئےوزیراعظم نے کہا کہ سی پیک کے فیز II کے تحت پائیدار ترقی، خصوصی اقتصادی زونز (SEZ’s)، صنعتوں، IT، کانوں اور معدنیات، زراعت اور متبادل توانائی کے شعبوں میں تعاون کو ترجیح دی جائے گی۔
دونوں رہنماؤں نے نیشنل پیپلز کانگریس اور پاکستان کی پارلیمنٹ کے درمیان روابط اور تعاون کو فروغ دینے پر اتفاق کرتے ہوئے پارلیمانی تبادلوں کو مضبوط بنانے کے لیے متعدد اقدامات تجویز کیے جن میں چین پاکستان فرینڈشپ گروپس کے درمیان رابطوں کو بڑھانا اور نوجوان پارلیمنٹیرینز کے وفود کا تبادلہ شامل ہے۔ دونوں فریقین نے سی پیک کے تحت سیاسی جماعتوں کے مشترکہ مشاورتی طریقہء کار کے اگلے دور کا انعقاد کرنے کی ضرورت پر زور دیا ۔
چیئرمین ژاؤ نے وزیر اعظم کو 2025-2026 کی مدت کے لیے اقوام متحدہ سلامتی کونسل کے غیر مستقل رکن کے طور پر منتخب ہونے پر مبارکباد دی۔ دونوں رہنماؤں نے اتفاق کیا کہ اس سے دونوں ممالک کو امن و آشتی پر مل کر کام کرنے اور اس حوالے سے قانون اور کثیرالجہتی کو فروغ دینے کا موقع ملے گا ۔
